2026-йисан 23-августдиз, кIе­лу­нин ЦIийи йисан вилик, Махачкъалада РД-дин Кьилин везифаяр вахту­налди тамамарзавай Фёдор Вячеславович Щукинан регьбервилик кваз кьиле фейи Дагъустандин­ муаллимрин совещанидал док­лад­рилай кьулухъ республикадин са жерге муаллимрив гьукуматдин шабагьар вахкана. 

«Йисан муаллимрин» арада 40 йисуз Ахцегьрин Валентин Эмирован тIварунихъ галай 2-нумрадин школада урус чIаланни литературадин тарсар гузвай Шерифалиева Раида Уружевнани авай. Адаз акьалтзавай несилдиз дуьзгуьн тербия ва дурумлу чирвилер гунай, образованидин хиле яргъал йисарин гьакъисагъ зегьметдай РФ-дин просвещенидин министерстводин приказдалди «Почётный работник сферы образования Российской Федерации» лагьай гьуьр­метдин тIвар гана.

Гьукуматдин чIехи шабагь муаллимдив «Сад тир Россия» политпартиядин патай РФ-дин Госдумадин депутат, просвещенидин рекьяй парламентдин комитетдин председателдин заместитель Нурбаганд Мегьамедович Нурбагандова вахкана.

Гьелбетда, и шабагь хуьруьн муаллимдин виниз тир пешекарвилел, аялриз тарс-тербия гунин карда яргъал йисарин четин ва жавабдар зегьметдал къимет эцигунин, райондин образование вилик тухуник хсуси пай кутунин лишан я. Мубарак­рай!

– Гьеле ХIХ асирда, 1861-йисуз, Дагъустандин хуьруьн чкада светский 1-школа кардик ака­тай Ахцегьар образованидин­ хилен бубайрилай атанвай хъсан адетралдини девлет­лу тежри­ба­далди тафаватлу я. Муаллим­вилин пешедал зун гъве­чIи чIа­валай ашукь тир. Гьукуматдин шабагь лагьайтIа (гьелбетда, ада зун мадни хъсандиз кIвалахунал гьевесламишзава), ам за анжах са жуван ваъ, гьакI уьмуьрлух муаллимвал авур зи рагьметлу диде-бубадин, Ахцегьрин 2-нумрадин школадин педколлективдин (директор – З.Б. Мегьамедалиева), райондин образованидин управленидин (начальник­ – З.А. Муталибова) ва, гьелбетда, райондин кьиле  авайбурун (регьбер – А-К.Н. Палчаев) зегьметдин агалкьунрин нетижа хьиз кьабулнава. Вири пара кьадар сагърай! – хуш теб­рикар кьабулуналди, лагьана Раида Уружевнади.

Саида Мурадова