Дагъустан Республикадин Кьил Сергей Меликован регьбервилик кваз 10-мартдиз «Сад тир Россия» партиядин региондин политсоветдин президиумдин заседание кьиле фена.  Адан кьилин тема Россиядин Госдумадиз ва РД-дин Халкьдин Собранидиз депутатар хкядай сечкийриз гьазур хьунихъ галаз алакъалуди тир.

«И сечкияр неинки чи республикадин, гьакI вири уьлкведин жемиятдинни сиясатдин уьмуьрда лап важиблу вакъиа­ жеда», – лагьана региондин кьили. Ада «Сад тир Россия» партиядин сечкийрилай виликан сесер гудай асул принципар­ рикIел хкана. Абурукай – сечкияр михьибур, гьахълубур ва экуьбур хьуникай – партиядин генсоветдин секретарь Владимир Якушева лагьанай. И партия уьл­кведа сечкийрилай виликан электронный сесер гун тешкилнавай  анжах сад  я.

«Виликамаз сесер гудайла, чна вири иштиракчийриз сад хьтин шартIар тешкилун лазим я. И кар исятда депутатар тирбурузни, цIийи кандидатризни, жемиятдин, волонтеррин организацийрин векилризни талукь я.  Дяведин махсус серенжемдин иштиракчийрикай кьилди лугьуз кIанзава. Абуруз сечкийрилай виликан сесер гуна иштиракдай вири мумкинвилер таъминарун чун патал важиблу я. Абур сиясатдин уьмуьрда иштиракунал желб авун Президент Владимир Владимирович Путина  ганвай тапшуругъ я.

А ксар женгера хьана, гъиле яракь аваз, Ватандин итижар ва Россиядин гележег хвена. Сечкийрин сиягьра абурун­ тIварар хьуни чи уьлквени, партияни мягькемарда», – лагьана региондин регьберди.

Ада алава хъувурвал, кандидатар кар чидайбур, гъавурда авайбур хьун важиблу месэла я. Абуру Дагъустандин агьалияр расалмиш жезвай бязи месэлаяр гьялдай дуьзгуьн рекьер теклифна кIанда.

Сечкийрилай виликан сесерай акъат­ тавурбур кадрийрин резервдин сиягьда твада.

Дагъустандин регьберди сечкийрилай виликан сесер гуна активный вири гражданриз иштиракдай мумкинвал гун теклифна. Абурун алакьунрикай, чирви­лерикай республикадиз менфят хкатдайвал авун герек я.

Къейд ийин хьи, гьазурлухвилин кIва­лахдив эгечIнава. 30-апрелдалди кандидатар къалурунин кIвалах давам жеда. Виликамаз электронный сесер гун 25-майдилай 31-майдалди кьиле фида.

Сергей Меликова чкадин отделенийрин президиумрин членрал ва секретаррал и кIвалах чпин гуьзчивилик кутун, кампания нукьсанар квачиз кьиле тухун тапшурмишна.

«Жавабдар вахт алукьзава. Чна гъа­л­атIриз, кар гуьгъуьна амукьуниз рехъ гана виже къведач. Чи хъсан кIвалахдилай, хкязавай кандидатрин еридилай сечкийрин юкъуз «Сад тир Россия» партиядин нетижаяр аслу жеда. Дагъустандин ва Россиядин абадвал патал чна важиблу ва еке кIвалах тухвана кIанзава», – лагьана региондин регьберди.

Сергей Меликова заседанидал къейд авурвал, сечкийрин ги­лан кампания геополитикадин маса шар­тIара кьиле физва. 2021-йисалай къенин йикъалди арадал атанвай вакъиайри гзаф крар дегиш хьунал гъана. Амма ида Верховный Главнокомандующийдин къас­ту­нал кIевивилиз таъсирнач: ада вичин итижар хуьз алакьдай къуватлу государство арадал гъунин кIвалах давамарзава.

Сергей Меликов экономикадин мес­элайрикай, яшайишдин программайрикай рахана.

Адан гафаралди, эхиримжи кьуд йисуз уьлкведин экономикадин гзаф хилер мягькемарна, оборонадин промышленность вилик тухуниз еке фикир гана. Гьа са вахтунда яшайишдин программаярни уьмуьрдиз кечирмишзава. Им чаз Да­гъус­тандин мисалдайни аквазва.

Региондин кьил милли проектар уьмуьр­диз кечирмишунални акъвазна. Ада рикIел хкана хьи, абуруз ахъайзавай пулар чна гьар йисуз 99 процентдин кьадарда аваз ишлемишзава. Им СКФО-да лап хъсан нетижа я.

Сечкийрилай виликан сесер гуниз ва партиядин тIварунихъай РД-дин Халкьдин Собранидиз депутатарвиле канди­датар къалуруниз талукь месэладикай пар­тиядин региондин отделенидин сек­ретардин заместитель Мегьамед Мегьамедова малумат гана.

Ада лагьайвал, виликамаз электронный сесер гуна 18 йис тамам хьанвай гьар са сечкичидивай иштиракиз жеда. Сесер гун PG.ER.RU сайтда кьиле фида.

Президиумдин членри РД-дин Халкьдин Собранидиз виликамаз сесер гун тешкилдай оргкомитетдин векилвилер Госдумадиз сечкияр тухудай гьеле кардик квай Региондин оргкомитетдал тапшурмишунин къарар кьабулна. Адак СВО-дин ва жемиятдин векиларни кваз 15 кас акатнава.

Нариман  Ибрагьимов