Сагъламвилин къаравулда
Алкьвадрин фельдшервилинни акушервилин пунктни (ФАП) медениятдин кIвалин патав гва. Чун ФАП-дин заведующий Жамиля Агьмедовадихъ (шикилда эрчIи патахъай галайди) ва акушерка Елена Балакъардашевадихъ галаз гуьруьшмиш хьана. Абуру чпин хиве авай везифайрикай, кIвалахдин шартIарикай ихтилатар авуна.
Жамиля Гьуьсейновнади Каспийск шегьердин медицинадин училище акьалтIарна. Сифтедай ада са шумуд йисуз ФАП-да медсестра яз зегьмет чIугуна. Хъсан чирвилер авай ва кIвалахдин девлетлу тежриба хьанвай пешекарди эхиримжи йисара ФАП-дин заведующийвиле кIвалахзава.
– Чи хуьре 1000-далай виниз агьалияр яшамиш жезва. Абурукай гзафбуру хуьрелай, райондилай ва республикадилай къеце кIвалахзава, – лугьузва Жамиля Гьуьсейновнади. – Хуьре гьамиша яшамиш жезвайбурун кьадар 550 касдив агакьзава. Чи медработникри абуруз медицинадин рекьяй къуллугъзава.
Хуьруьн агьалийрикай 118 кас цIукьуд йисал къведалди яшда авай аялар ва жаванар я. Абурун, гьакIни яшлу, набут инсанрин гьакъиндай медработникри кьетIен къайгъударвал ийизва. Медицинадин пешекарар мукьвал-мукьвал абурун кIвалериз физва, сагъламвал ахтармишзава лазимвал авайбуруз герек тир куьмекар гузва.
Е. Балакъардашевани вичин пешедал рикI алай, кIвалахдин гзаф йисарин тежриба авай акушерка я. Ада хиве авай везифаяр намуслудаказ кьилиз акъудзава.
– Чи хуьре аялар хадай яшара авай 276 дишегьли ава, – лугьузва Е. Балакъардашевади. – Сагълам аял анжах сагълам дидедиз жеда. И кар фикирда кьуна, чна дишегьлийрин сагъламвилел кьетIен гуьзчивал тухузва. Алай вахтунда чи учетда кIвачел заланзавай 3 дишегьли ава. Мукьвара кьве дишегьлидиз аялар хьана, абур чи гьар йикъан гуьзчивилик ква. Гьам аялрин, гьамни дидейрин сагъламвал чаз, гьелбетда, багьа я.
ФАП-дин заведующий Ж. Агьмедовади чаз лагьайвал, пунктуна аялрин духтур яз Людмила Агьмедовади кIвалахзава. Адахъни кIвалахдин 30 йисан тежриба ава. Чун ФАП-да авайла, Л. Агьмедова гъвечIи аялар авай садан кIвализ абурун сагъламвал ахтармишиз фенвай. Им адаз адет хьанвай кар я.
Фельдшервилинни акушервилин пункт дарманралди, герек маса шейэралди райондин центральный больницади вахт-вахтунда таъминарзава.
Пункт гъвечIи пуд кабинетдикай ибарат тир дараматда кардик ква. Медработникри чпин хиве авай везифаяр намуслудаказ кьилиз акъудзава. Агьмедова Жамиля, Балакъардашева Елена ва Агьмедова Людмила хкянавай пешедиз вафалу пешекарар я лагьайтIа, зун ягъалмиш жедач. Намуслу зегьметдай абуруз хуьруьнвийри сагърай лугьузва.
Хазран Кьасумов