И гьафтедин эвел кьилера Дербент районда авай туризмдин «Рубас» базада ял язавайбурук ратарин азар акатнавайди винел акъатна. Нетижада 20 кас (абурукай 17 аялар я) Дербент шегьердин кьилин духтурханадин инфекцийрин отделенида къаткурна.
25-августдиз Махачкъалада РД-дин Гьукуматдин Председатель Абдулмуслим Абдулмуслимован регьбервилик кваз и дуьшуьшдиз талукь совещание кьиле фена. Совещанидал хабар гайивал, ял язавайбурук ратарин азар абур республикадин са районда сиягьатда авай чIавуз акатун мумкин я. Абуру ина нисинихъ тIуьн тIуьнвай. Роспотребнадзордин Управленидин пешекарри азардин чешме тайинарун патал «Рубас» базада ва сиягьат кьиле фейи хуьре ахтармишунар кьиле тухузва.
РД-дин Кьил Сергей Меликова вичин телеграм-каналда къейднавайвал, арадал атанвай дуьшуьшдин гьакъиндай уголовный дело къарагъарнава, силисчийри тахсиркарар тайинарун патал герек тир мярекатар кьиле тухузва.
«Арадал атанвай гьалар зи хсуси гуьзчивилик ква. И дуьшуьшдин гьакъиндай тайин тир нетижаяр кьадайди, жавабдар ксарив жаза агакьардайди хиве кьазва. Дагъустанда ихьтин крар хьун лазим туш. Чна алай вахтунда инсанриз жуьреба-жуьре къуллугъар теклифзавай «хъендик квай карчивални» винел акъудунал кIвалахзава», — кхьенва С.Меликова вичин каналда.
Дагъустандин Кьили раижнавай малуматдай гьакIни хабар жезвайвал, «Рубас» базади къанун-къайдадин истемишунрал амал тавуна кIвалахзавай, я аниз ял ягъиз атай ксаривни (ихтилат начагъ хьайибурукай физва) чпин сагъламвилиз талукь справкаяр гвачир. Справкаяр галачиз лагердиз кьабулдай ихтиярарни авач.
Чи мухбир
