Чна виликамаз хабар гайивал, 22-февралдиз, азаддаказ кьуршахар кьунай СКФО-дин чемпионатдин сифтегьан юкъуз (акъажунар 25-февралдалди давам хьана), и мукьвара Каспийскда кьиле фейи Дагъустандин чемпионатда гимишдин медаль къазанмишай Рамазан Ферзалиева 65 кг-дин заланвал авайбурун арада 1-чка кьуна. Идалди чи ватанэгьлиди апрелдин эхирра Москвада кьиле фидай уьлкведин чемпионатдиз путёвка къазанмишна. РикIел хкин, цIи, Олимпиададин йисуз, и акъажунрин кесерлувал мадни хкаж жезва.
Къейд авун лазим я хьи, Нальчикда Дагъустандин хкянавай командади вири санлай 22 медаль (абурукай къизилдинбур — 7, гимишдинбур — 7 ва буьруьнждинбур — 9) къазанмишна.
Рамазан Ферзалиеваз СКФО-дин чемпионвилин тIвар къазанмишун патал анжах кьве бягьс кьиле тухун лазим атана. ГьикI хьи, 1-кругда ва финалдин бягьсера чи ватанэгьлидихъ галаз гьасиррал чпин къуватар ахтармишун лазим тир спортсменар гьасиррал экъечIнач.
Рагнеда Рамалданова
