«Россиядин тIямар»
13-августдилай Москвада ВДНХ-дин мулкунал милли тIуьнрин «Россиядин тIямар» фестиваль 5-лагьай сеферда кьиле физва. Гегьеншдаказ тешкилнавай ва Россиядин Федерациядин суьрсетдин девлетар ва тIуьнрин жуьреба-жуьревал майдандиз акъудун лазим тир и мярекат 23-августдалди давам жеда, хабар гузва РД-дин хуьруьн майишатдин ва недай суьрсетдин министерстводи.
Дагъустан Республикади фестивалда активнидаказ иштиракзава: ина Кавказдин халкьариз хас ва вичиз тешпигь авачир рангарин дуьзгуьнвал, гьакIни республикадин адетдин тIуьнар, суьрсет майдандиз акъуднава. Уьлкведин меркездин агьалияр патал метлеблу презентация ва недай шейэрикай дад акун фикирда кьунвай программа гьазурнава.
ВДНХ-дин мулкунал ачухнавай Дагъустандин майданрал мугьманривай неинки гьар са няметдин дад акваз, гьакIни республикадин кар алай карханайри акъуднавай хуьруьн майишатдин ерилу ва тIебии суьрсет маса къачуз жезва. ИкI, «Россиядин тIямар» выставкадин сергьятра аваз, Ботлих райондай тир «Баранди» карханади Москвадин агьалийриз республикадин гьерерин вижевай якIукай шишинал чранвайди ва луьле-кабаб теклифзава. Гьа и райондай тир «Аквариус» компанияди емишрин михьи ва ерилу мижеяр гъанва. Мегьарамдхуьруьн райондай тир «Пош» компанияди («Enjoy Food» бренд) штIумарнавай помидорар, хутар, бадамжанар, гьакIни некьияр майдандиз акъуднава. «Дидо» ва «Кавказдин къуват» карханайри мугьманар менфятлу хвехверикай ва тумарикай гьазурнавай Дагъустандин адетдин кIепIерихъ (урбеч) галаз танишарзава. Мекерадиз гьакIни республикадин дагъларин жуьреба-жуьре хъчар, чаяр гзаф кьадарда гъанва.
Фестивалдин тIуьнрин майдан «Къванцин цуьк» фонтандинни Халкьарин дуствилин майдандин арада авай аллеядал ачухнава. Гегьенш мекерадилай ва тIуьнар недай майдандилай гъейри, мугьманар патал милли тIуьнрикай дад аквадай сессияр тешкилнавай «ЦипицIар» чкани кардик ква. Вири хизан патал тӀуьнин мастер-классар ва илимдинни чирвилер гудай программаярни кьиле тухузва.
Къейд ийин, сифте кьиляй «Россиядин тIямар» уьлкведин хуьруьн майишатдин министерстводи кьиле тухузвай регионрин недай суьрсетрин-брендрин конкурс тир. Гуьгъуьнлай ам гастрономиядин рекьяй еке фестивалдиз элкъвена. Адан асул макьсад – уьлкведин гьар жуьре пипIерай-регионрай тир тIуьнар, недай суьрсет ва кулинариядин адетар са чкадал кIватIун, Россиядин тIямрин жуьреба-жуьревал къалурун ва хуьруьн майишатдин рекье гъвечIи карханайрин тереф хуьн, куьмек гун. 2026-йисуз фестиваль Россиядин халкьарин садвилин йикъахъ галаз алакъалу авунва.
РД-дин хуьруьн майишатдин ва недай суьрсетдин министерстводи ватанэгьлийриз, меркездин вири мугьманриз ВДНХ-да ачухнавай Дагъустандин майданрал кьил чӀугваз атун теклифзава.
Жасмина Саидова