И йикъара Тула шегьерда залан атлетикадай Россиядин Кубок патал кьиле физвай акъажунра (абур 26-январдиз башламишна) чи ватанэгьли Исмаил Гьажибегова 55 кг-дал къведалди заланвал авайбурун арада инанмишвилелди гъалибвал къазанмишна. Гила ам уьлкведин Кубокдиз галаз-галаз 4-сеферда лайихлу хьанва. Дагъустанвийрикай ихьтин еке агалкьун къазанмишиз алакьнавай ам сад лагьай спортсмен я. ИкI, и сефердани акъажунра иштиракай республикадин хкянавай командадай медаль анжах са чи ватанэгьлидивай къазанмишиз алакьна.
Къейд авун лазим я хьи, пака, 2-февралдиз, акьалтIдай и акъажунра чи уьлкведин жуьреба-жуьре регионрай тир 330-дав агакьна спортсменри чпин алакьунар ва устадвал къалурзава. И.Гьажибегова, санлай къачурла, 227 кг хкажна (рывокда — 107 ва толчокда — 120 кг).
РикIел хкин: вичин ери-бине Докъузпара райондин Мискискарин хуьряй тир Исмаил Гьажибегова тренер Гьуьсенхан Закарьяеван гъилик вичин устадвал хкажзава. Ам, Россиядин кубокрин хьиз, уьлкведин кьве сеферда чемпионвилин ва кьве сеферда призёрвилин тIварарин сагьибни я.
Рагнеда Рамалданова
