И йикъара Новосибирскда грэпплингдай кьиле фейи Россиядин чемпионатда – дуьньядин чемпионатдиз хкядай­ акъажунра – чи са шумуд ватан­эгь­ли­ди кIвенкIвечи чкаяр кьуна. ИкI, чемпионатдин сифтегьан юкъуз кимо­но ала­чиз бягьс чIугунин жуьредай­ чпи Ма­хачкъалада, «Old_school_fighters» клубда, тренер Амин Бабаеван гъилик устадвал хкажзавай Арсен Сулейманова (92 кг) – 1, Артур Агъаширинова (66 кг) – 2, Гьабиб Атлуева (66 кг) ва Имам Жамирзеева (100 кг-дилай виниз заланвал авайбурун арада) 3-чкаяр кьуна.

Гуьгъуьнин юкъуз Имам Жамирзеева­ 100 кг-дилай виниз заланвал авайбурун арада кимоно алаз бягьс чIугунин жуьредай къизилдин медал къазанмишна. Гила­ адакай Россиядин чемпион 5-сеферда хьанва.

Мадни чи ватанэгьлийрикай Башкирияда яшамиш жезвай Низам Идрисова 71 кг-дин заланвал авайбурун арада, кимоно алаз бягьс чIугунин жуьредай къизилдин медаль къазанмишна. КьетIендаказ къейд авуниз лайихлу кар мадни ам я хьи, вичин­ буба Ислам Лазимовичан гъилик устадвал­ хкажзавай Низам Идрисов Башкирияда грэп­плингдай Россиядин чемпионвилин тIвар къазанмишнавай сад лагьай спорт­смен я.

ХМАО-Юградин Лангепас шегьерда яшамиш жезвай чи ва­танэгьли, ери-бине Дербент райондин ЛукIарин хуьряй тир «Юградин дамах» Ислам Абдуллаева гимишдин медаль къазанмишна. РикIел хкин: 2024-йисуз 21-йисал къведалди­ яшара авай жегьилрин арада грэпплингдай Европадин кIвенкIвечивал патал акъажунра гъалибвал къазанмишайла, ХМАО-Юградин губернаторди чи ватанэгьлидиз гьуьрметдин «Юградин дамах» тIвар ганай.

Къуй чи ватанэгьлийрихъ дуьньядин чемпионатдани еке агалкьунар хьурай!

Рагнеда Рамалданова