Мукьвара чи арадай хейлин йисара Кьурагь райондин КIирийрин хуьруьн медениятдин кIвализ регьбервал гайи Дагъустандин медениятдин лайихлу къуллугъчи, зегьметдин ветеран Темучин Мегьамедович Къурбанов акъатна.
Ам 1937-йисуз КIирийрин хуьре дидедиз хьана. Хейлин маса аялрин хьиз, Темучинан аял вахтарни Ватандин ЧIехи дяведин йисарал ацалтна. Гьикьван четинвилер акунатIани, адаз кIелдай, образование къачудай, уьмуьрдин гурарай винелди хкаж жедай мумкинвал хьана.
Т. Къурбанова вичин уьмуьр медениятдихъ галаз алакъалу авуна. Гьеле 6-классда кIелзавайла, ада тар ягъиз чирна. Мектеб акьалтIарайдалай кьулухъ, 1959-йисуз, ам КIирийрин хуьруьн клубда художественный руководитель яз кIвалахал кьабулна. Ина зегьмет чIугур йисара Т.Къурбанова гьам райондин, гьамни республикадин дережада аваз кьиле фейи хейлин конкурсра, межлисра, мярекатра иштиракна, Кьурагь дагъларин тIвар жуьреба-жуьре майданра машгьурна. Са сеферда адаз, райондин хуьрерин клубрин коллективрин арада кьиле фейи концертда гъалиб хьайила, пишкеш яз, чIагъанни ганай.
Т. Къурбанова 1961-йисуз Махачкъалада музыкадин училищедик экечIна. Гуьгъуьнлай Буйнакскдин финансринни экономикадин техникумни акьалтIарна. Жуьреба-жуьре йисара ада Кьурагь райондин финотделда, госбанкдин отделда зегьмет чIугуна. Амма экономикадин хиле ам яргъалди амукьнач, вичин руьгьдин пешеди ам элкъвена КIирийрин хуьруьн клубдиз хкана.
Темучин Мегьамедовича яргъал йисара хуьруьн медениятдин кIвале директор яз зегьмет чIугуна, райондин, республикадин милли искусство вилик финик вичин пай кутуна. Чешнелу хизан арадал гъана, хуьруьн жемятдин патай вичиз гьуьрмет къазанмишна.
Аллагьдин кьадар-кьисметар я, са несил хъфизва, адан чкадал цIийи несил хквезва. Темучин Мегьамедович Къурбанов чи арада амачтIани, адан тIвар ам чидайбурун рикIера амукьда. Къуй адан веледриз, хтулриз, птулриз Аллагьди яргъи уьмуьрар гурай. Амин!
«ЛГ»
