И йикъара чав перишан ­хабар агакьна. Яргъал чIугур азардикди, 95 йисан яшда аваз халкьдин майишатдин са шу­муд хиле гьакъисагъвилелди зегьмет чIугур, Лезгинцеврин фонд тешкилай ва адаз регьбервал гайи ватанэгьли, ашахуьруьнви Ибрагьимхалилов Рамазан Ибрагьимович рагьметдиз ­фена.

Р.И. Ибрагьимхалилов 1931- йисан апрелдиз Кьурагь райондин Ашахуьре лежбердин хизанда дидедиз хьана.

Дагъустандин ва Кеферпатан Осетиядин госуниверсите­­тар акьалтIарай Р. Ибра­гьим­ха­лилова­ Штул­­рин хуьруьн 8-йисан шко­лада­ муалливиле, ахпа анин ди­рек­тор­виле кIвалахна. Кол­хоз­дин нубатдин собранидал жемятди кар алакьдай, хуь­руьн­вийрихъ рикI кузвай кас «1-Май» тIвар алай колхоздин сед­ривиле хкяна. Адан алахъунар­ себеб яз, Ашахуьруьз дуьз рехъ, электричестводин, телефондин­ линияр тухвана, булах туь­кIуьр­на, хуьре медпунктунин, туьквендин­, клубдин, фермайрин дарама­тар эцигна, колхоздиз пар чIуг­ва­дай машин къачуна. Калун участокда фермаяр эцигна, ци­пицIлух кутуна, къуьл цазвай­ никIерин майданар гегьеншарна. Майишатди гьар йисуз хъсан бегьерарни къачуна. Къазанмишай нетижайрай колхоз кьве сеферда РСФСР-дин хуьруьн майишатдин министерстводин гьуьрметдин грамотайриз лайихлу хьана, ДАССР-дин Гьуьрметдин доскадиз акъудна. Ибрагьимхалилован баркаллу зегьмет «Знак Почета» ордендалди, «Гьу­нар­лу зегьметдай» медалдалди, ДАССР-дин Верховный Советдин Президиумдин гьуьрметдин грамотадалди къейдна.

Уьлкведа дегишвилерив га­тIу­найла, Ибрагьимхалилов Ма­хачкъаладиз атана ва ада рес­пу­бликадин муаллимрин чирви­лер хкаждай институтда­ кIва­ла­хун давамарна. Амма аша­хуь­руьн­вийри ам секиндиз тунач. Колхоз барбатI жез акурла,­ районда «Дагъларин иеси»­ тIвар акьалтнавай касдивай мад ма­йишатдин кьиле акъва­зун тIа­лабна. Рамазанавай жемятдин гаф чIуриз хьанач. Ада мадни цIуд йисуз колхоздиз регьбервал хгана.

Лезги халкьдин баркаллу­ хва Мегьамед Лезгинцеван ва адан рухвайрин кьисметди секинсуз авур Ибрагьимхали­лов­ абурун лайихлу зегьметар, агал­кьунар рикIел хуьдайвал ийиз алахъна. Лезгинцеврин фонд тешкилна, абуруз Махачкъалада памятник эцигдай чил чара ийиз туна, памятникни заказ гана. Скульп­торди памятникарни гьазурна. Гьайиф хьи, инсульт хьайидалай гуьгъуьниз кIеве гьатай уьтквем итим вичи гъиле кьур кар кьилиз акъудиз агакьнач. Инанмиш я хьи, адан невейри и важиблу ва баркаллу кар давамарда. Рагьмет хьурай вичиз.

«Лезги газетдин» редакциядин коллективди Рамазан Ибрагьимовичан хизандиз, багърийриз, дериндай хажалат чIугунивди, башсагълугъвал гузва.

"Лезги газет"