Алай вахтунда республикадин шегьеррин ва районрин школайра 2-9-классра кIелзавай 9 агъзурдалай гзаф аялри, санлай 512 командади, Дагъустандин школадин футболдин (кIелунин 2023/2024-йисарин) лигада чпин устадвал къалурзава. И йикъара финалдин 32-дакай (1/32) ва 16-дакай (1/16) сад лагьай паярин къугъунар кьиле тухванва. Виринра абур, Москвадин патав гвай Красногорск шегьерда кьиле фейи терактдин къурбандрин экуь къаматар рикIел хкунин лишан яз, са декьикьада вири кисна акъвазунилай башламишна.
РикIел хкин: школадин футболдин лига алатай йисан 20-октябрдилай башламишнава. Муниципалитетра кьиле тухвай паяра хъсандиз къугъвай классри гила республикадин дережада аваз чпин алакьунар къалурзава. Нубатдин,1/8-паюнин, къугъунар 20-апрелдиз Махачкъалада, РД-дин образованидин ва илимдин министерстводин РДЮСШ-дин (республикадин аялринни жаванрин спортшколадин) футболдин майдандал кьиле фида. Къугъунар майдиз акьалтIда.
Кьурагь райондани 1/32 ва 1/16 паярин къугъунар хъсан тешкиллувал аваз кьиле фена. Райадминистрациядин пресс-къуллугъди хабар гузвайвал, 1/32-паюна Хив райондай атанвай командайрини иштиракна. ИкI, 1-нумрадин юкьван школадин мини-футболдин майдандал кьиле фейи вири гуьруьшра Кьурагь райондин жаван футболистри кIвенкIвечи чкаяр кьуна. Кьве райондин командайрайни хъсандиз къугъвай футболистриз тешкиллувилин комитетдин патай пишкешар гана. РДЮСШ-дин тренер, кьилин судьявилин векилвал ганвай Максим Къулиева кьурагьвийриз акъажунар хъсандиз тешкилунай сагърай лагьана.
7-апрелдиз Кьурагьрин хуьруьн 1-нумрадин СОШ-дин мини-футболдин майдандал кьиле фейи футболдин лигадин 1/16 паюнин къугъуна Хив, Мегьарамдхуьруьн, Докъузпара районрин школайрин жаван футболистрини чпин устадвал къалурна. Къизгъиндаказ кьиле фейи къугъунрин нетижада акъажунрин 1/8 паюниз агъадихъ галай командаяр акъатна: 2-класс (Хивдин СОШ), 3 ва 9-классар (КьепIиррин СОШ), 4, 6 ва 7-классар (Кьурагьрин 1-нумрадин СОШ), 5-класс (Кьурагьрин 2-нумрадин СОШ), 8-класс (Гъепцегьрин школа).
Рагнеда Рамалданова
