«Рекъемрин психолог»
1-октябрдилай цIийи хъувунвай «Рекъемрин психолог» къуллугъдикай Россиядин вири регионра менфят къачуз жеда, хабар гузва РФ-дин просвещенидин министерстводи.
«Рекъемрин психолог» – им алай аямдин образованидин къуллугъ я. Адан куьмекдалди аялривай ва абурун диде-бубайривай, арада мензил аваз, пешекар психологрин-педагогрин куьмекдикай менфят къачуз жеда. Психологдиз арза ийидай, яни адан куьмек ишлемишиз жедай месэлайрик акатзава: муаллимрихъ галаз алакъаяр, кIелунин рекье гьевесламиш жез, масабурухъ галаз рафтарвилер ийиз четин хьун, аялдиз тербия гунин ва ам виликди тухунин месэлаяр, хизанда четин гьалар, чIуру хесетар, психологиядин жигьетдай хьанвай зарар «иливарун», дустарихъ галаз чуьруькар ва икI мад.
И къуллугъдикай менфят къачун патал милли «МАКС» месенджер тайинарна кIанда. Онлайн къайдада гуьруьш хьайидалай кьулухъ куьмек герек касдиз педагогдин-психологдин меслятар рекье твазва. Лагьана кIанда, и рекье куьмек гузвай пешекаррин кьадар датIана гзаф жезва.
Идалай вилик гьакIни суткадин кьиляй-кьилиз психологиядин рекьяй куьмек гунал машгъул тир «Ихтибардин школа» линия кардик кутунай. И рекьяй куьмек пулсузди тир телефондин 8-800-707-02-01 нумрадай зенг авуна, къачуз жеда.
Ж. Саидова