КIвалахар давамарзава

Дагъустанда рекьер къайдадик кваз хуьнин жигьетдай герек кIвалахар давамарзава. Идакай РД-дин транспортдин ва рекьерин майишатдин министерстводин телеграм-каналди хабар гузва.

Чешмедин малуматралди, региондин мулкара рекьерин къурулуш хуьнин жигьетдай кIвалахар кьиле тухузва. Ара атIунар авачир хатасуз гьерекат таъминарун патал дагълух ва дуьзенлух районра бригадайри зегьмет чIугвазва.

Кьилди къачуртIа, рекьерин къуллугъ­дин пешекаррин асул везифайрик акатзава:

– Дагъустанда алай йисан мартдин эхирдай ва апрелдин эвел кьиляй селлер атунин чIуру нетижаяр арадай акъудун;

– рекьер зирзибилрикай ва жуьреба-жуьре маса шейэрикай михьун;

– рекьерал авахьнавай шим-накьв михьун;

– машинар фидай рекьерилай къванер ахлудун;

– фурар хьанвай чкаяр ремонт хъувун;

– чиргъ вегьена туькIуьрнавай рекьер къайдадиз хкун, рекьерин лишанар михьун.

Пешекарри гьар юкъуз рекьеравай гьаларал гуьзчивал тухун давамарзава.

Кар алайди – алакъа  

«Газпром межрегионгаз Махачкала» компаниядин ифей линиядин операторар йисан эвел кьилелай инихъ агьалийрилай атай 10 агъзурдалай гзаф чарариз килигнава. Идакай «Дагъустан патал газ» телеграм-каналди хабар гузва.

Раижзавайвал, гзафни-гзаф агьалийри итижзавай суалар счетчикри къалурзавай рекъемар агакьаруниз, газификациядиз, гьакIни газ агакьарун патал икьрарар кутIунуниз ва газдин тадаракдихъ технический жигьетдай гелкъуьниз талукьбур я.

Компаниядин генеральный директор Р. Мурадова раижзавай къейдерин гъавур­да акьазвайвал, республикадин гьар са агьалидивай дуьм-дуьз ва вахтундамаз жаваб къачуз хьун газдин компания патал метлеблу кар я. Гьавиляй ифей линия (8 800 200 98 04) абонент­рихъ галаз алакъа­дал хьунин жигьетдай кар алай такьат яз амукьзава.

Виликдай «Дагъустан патал газ» те­леграм-ка­­налди раиж авурвал, респуб­ликадин агьалийри хабар кьазвай суалрикай 15 процент газ ишлемишунай гузвай гьакъидихъ галаз алакъалубур я.

Чешмеди къейдзавайвал, абонентри виридалайни гзаф ихьтин кардин пата­хъай гъавурда тун тIалабзава: счетчик авайла ва газ гьар сеферда гьа са кьадар ишлемишзавайла, гьакъидин кьадар вучиз артух жезва?

Идарадин пешекарри ихьтин гьал арадал атунин кьилин себебрикай ла­гьана.

– Иесиди счет­чик­ди газ ишле­мишунин кьадар къа­лурза­вай ре­къе­мар­ идарадиз вахтунда рекье твазвач. Эгер газ иш­ле­мишзавай касди гьар вацра 20-йи­къалай 25-йикъалди ресурс­далди таъ­минарзавай идарадиз счетчикди­н «алай вахтунин» ре­къемар­ рекье твазвачтIа, и «киснавай муддатда» сифтегьан пуд вацра газ ишлемишунай гьа­къи­дин кьадар вацра ишлемишзавай газдин юкьван гьисаб фикирда кьуна ­тайинарда, кьуд лагьай вацралай – гьа­къидин кьадар нормативдал асаслу яз акъудда.

– Квартирада счетчик эцигнава, амма ие­си­ патал фенва (яни ана яшамиш жезвач). КIвал ичIи яз хьайитIани, счетчикдин рекъемар гьар вацра ресурсдалди таъминарзавай тешкилатдив агакьарун герек я. ИкI тавуртIа, нормативдалди гьакъи гудай схема кардик акатда. Амма эгер яргъал вахтунда пата-къерехдиз фидай игьтияж арадал атайтIа, мисал яз, зур йисуз ва я йисан вахтунда­, ихьтин дуьшуьшра и кардикай ресурсдалди таъминарзавай тешкилатдиз чарасуз хабар гана кIанда.

Ихьтин дуьшуьшра ракъурнавай гьа­къийрин гьахъ-гьисаб хъувун патал­ газ агакьарзавай идарадиз лагьана кIанда.

– Счетчик ишлемишун патал виже къведайди туш. Гьар са счетчикдин пас­портда чарасуздаказ ам акъуднавай вахт ва гьикьван муддат арадай фейила ахтармишна кIандатIа къалурнава – счетчик ишлемишиз жедай кьван вахт. И вахт акьалтI хьайила, прибор ахтармишна кIанда. И серенжем газ чара ийидай тешкилатри кьиле тухузва: прибор гележегда ишлемишун патал виже къведай гьалда авани, авачни тайинарун патал.

Эгер паспортда къалурнавай муд­дат­да­ счетчик ахтармиш тавуртIа, газ иш­ле­мишу­най гузвай гьакъидин кьадар норма­тивдин жуьреда къалурда…

Чешмеди къейдзавайвал, тамам делилар чирун ва я меслятар къачун патал телефондин 8 (800) 200 98 04 нумрадиз зенг ийиз жеда.

Гьазурайди – М.  Агьмедов