Пуд агъзур кьван
Малуматрин «Дагъустан» РИА-да республикадин военный комиссар Абдурагьман Мурадхановахъ галаз пресс-конференция кьиле фена.
Военкомди лагьайвал, алай йисан эхирдалди Россиядин Яракьлу къуватрин кьушунриз пуд агъзурдав агакьна жегьилар рекье твада. Абурун са пай гатфарин призывдик акатна ва абуру алай вахтунда военный са шумуд округдин жуьреба-жуьре частара къуллугъзава.
Армиядин жергейриз яшар 18-далай 30 йисалди тир жегьилар тухузва. Зулун призывдин цIийивал ам я хьи, жегьилар армияда къуллугъ авунал желбдайла, государстводин информациядин «Единый реестр воинского учета» къурулушдикай менфят къачузва. Ида государстводин къуллугъдин порталдай призывникриз электронный повесткаяр рекье твадай мумкинвал гузва.
Абдурагьман Мурадханова мад сеферда тикрарна хьи, са йисан вахтунда армиядин жергейриз желбзавайбур дяведин махсус серенжемдиз тухузвач. Абур, чпин къуллугъ кьилиз акъудна, армиядай кIвалериз хкведа.
Дагъустандин военный комиссариат ва сборный пунктар зулун призыв кьиле тухуз вири терефрихъай гьазур я. Республикада призывдин 53 комиссия кардик ква. Армиядиз тухузвайбурун сагъламвал 500-далай виниз духтурри ахтармишзава. ДОСААФ-дин идарайри военный пешекарар гьазурунин кIвалахни къайдадик ква.
Дагъустанвийрин сифте дестеяр 10-октябрдиз армиядиз тухвана. Хъсан рехъ хьурай! Ватандиз лайихлувилелди къуллугъна, хтурай чи рухваяр.
"Лезги газет"