4-майдиз РФ-дин Президент Владимир Путина вичин Указдалди Дагъустан Республикадин Кьилин везифаяр вахтуналди тамамарзавайди яз Фёдор Вячеславович Щукин тайинарна.
Сергей Меликова вичи Дагъустан Республикадин Кьилин везифаяр тамамарун вахтунилай вилик акъвазарзавайдан гьакъиндай гуьгьуьллудаказ арза кхьена ва ам уьлкведин Президентди тестикьарна.
Гаф кватай чкадал къейд ийин хьи, Сергей Меликова республикадиз регьбервал гуз саки 5 йис хьана. Официальнидаказ Дагъустандин Кьил яз адал ихтибарнавай везифайрин вахт алай йисан зулухъай акьалтIзавай.
Фёдор Щукин 1976-йисан 4-августдиз дидедиз хьана. Адан бинеяр Нижегородский областдай я. 1997-йисуз Н.И. Лобачевскийдин тIварцIихъ галай университетдин юридический факультет акьалтIарна, 2002-йисуз – Мордовиядин госуниверситет.
Жуьреба-жуьре йисара Фёдор Щукина промышленностдин карханайра юридический консультант, райондин собранидин депутат, мировой судья, райондин судья, райондин суддин председатель яз кIвалахна. 2020-йисалай ада Нижегородский областдин суддин регьбердин заместителдин везифаяр тамамарна. 2024-йисан февралдиз Россиядин Президентдин Указдалди Фёдор Щукин Дагъустан Республикадин Верховный суддин председателвиле тайинарна.
6-майдиз Махачкъалада Фёдор Вячеславович Щукин Дагъустан Республикадин Кьилин везифаяр вахтуналди тамамарзавайди яз малумаруниз талукьарнавай мярекат кьиле фена. Ана СКФО-да РФ-дин Президентдин патай тамам ихтиярар ганвай векил Юрий Чайкади, адан заместитель Мегьамед Рамазанова, Дагъустандин виликан регьбер Сергей Меликова, РД-дин Гьукуматдин, Халкьдин Собранидин Председателри, РФ-дин Госдумадин, РД-дин Халкьдин Собранидин депутатри ва масабуру иштиракна.
Мярекатдал Юрий Чайкади Фёдор Щукин Дагъустан Республикадин Кьилин везифаяр вахтуналди тамамарзавайди яз тайинарунин жигьетдай РФ-дин Президент Владимир Путина къул чIугунвай Указ кIелна. Ада гьакIни Сергей Меликоваз са шумуд йисан къене республикада кьиле тухвай кIвалахдай сагърай лагьана ва вич адан алакьунарни тежриба маса къуллугъдал мадни герек къведайдахъ инанмиш тирдакай лагьана.
ЦIийи регьбердин вилик акъвазнавай кар алай месэлайрикай рахадайла, Юрий Чайкади сифте чкадал мукьвара къвайи къати марфарин нетижада арадал атай чIуру гьалар арадай акъудун ва зиянар хьанвай гьар са касдив куьмек агакьарун тирди къейдна. Уьлкведин Президентдин Векилди алава хъувурвал, Фёдор Щукинахъ суддин къурулушда кIвалахзавай йисара хьанвай тежрибади адаз вилик акъвазнавай месэлаяр гьялунин карда куьмек гуда.
Мярекатдал Сергей Меликовни рахана. Ада вичихъ галаз санал кIвалахай юлдашриз – гьукумдин къурулушрин векилриз – сагърай лагьана ва и йисара вичи арадал гъайи дестедилай Дагъустанда хейлин крар кьилиз акъудиз алакьайди къейдна.
Фёдор Щукина вичиз ихтибар авунай РФ-дин Президент Владимир Путинан тIварцIихъ разивилин келимаяр лагьана ва республикадин Кьилин къуллугъ гьар са дагъустанвидин вилик жавабдарди тирди къейдна.
«Дагъустан жуьреба-жуьре медениятрин, чIаларин, адетрин надир макан я. Зи везифа гьар садаз – яхулвидиз, аварвидиз, даргидиз, лезгидиз, табасаранвидиз, Дагъустан вичин ватан яз гьисабзавай гьар са халкьдин векилдиз къуллугъ авуникай ибарат я», — алава хъувуна ада.
Фёдор Щукина гьакIни кьиле тухвай кIвалахдай Сергей Меликоваз сагърай лагьана, ада кьил кутур вири проектар давамардайди ва тамамардайди тестикьарна.
Агьмед Магьмудов
