Жалауддин Загьидинович Абдуразакьов 1959-йисан 24-июлдиз Мегьарамдхуьруьн райондин Чахчарин хуьре дидедиз хьана. 1979-йисалай ам КПРФ-дин член я. Алай вахтунда Покачи шегьерда КПРФ-дин комитетдин сад лагьай секретарь я.
Ж.Абдуразакьова 1992-йисуз Екатеринбург шегьерда политологдин ва яшайишдинни сиясатдин дисциплинайрин муаллимвилин пешедай Уралдин яшайишдинни сиясатдин институт, 1995-йисуз экономист-менеджер пешедай Уралдин государстводин къуллугъдин академия куьтягьна.
Покачи шегьерда кlвалахдин рекьяй алай вахтунда 32 йисан тежриба авай, къанни кьве йисуз чкадин самоуправленидин органра кlвалахнавай Жалауддин Абдуразакьов “Лезги халкьарин Виридуьньядин Конгресс” Регионрин уртах жемиятдин гьерекатдин Ханты-Мансийский регионда авай отделенидин председателни я.
Ватанэгьлидин 1986-йисалай инихъ тlвар кьунвай шегьерда кьилиз акъуднавай ва акъудзавай къуллугърикай галай-галайвал рахун тавуна жедач.
Покачида ада вичин зегьметдин рехъ 1986-йисуз ВЛКСМ-дин Лангепасский горкомдин “Покачевнефтегаз” НГДУ-дин комсомолдин комитетдин секретарвилелай башламишна. 1989-йисуз ам Свердловскдин кьилин партийный школадиз ракъурна. 1991-йисалай адакай КПРФ-дин Покачидин ГК-дин сад лагьай секретарь хьана. Ам ХМАО-да КПРФ-дин парттешкилатдин бине кутурбурукай сад я.
1994-йисуз ада Покачи шегьердин администрациядин жегьилрин крарин рекьяй отделдин заведующий яз, 1995-2015-йисара и шегьердин администрациядин медениятдин ва жегьилрин сиясатдин управленидин начальникдин заместитель яз кlвалахна.
Жалауддин Абдуразакьов са шумуд терефдихъай кlвалахдай алакьунарни пешекарвал авай кас я. Жегьилрин сиясатдин месэлаяр уьмуьрдиз куьчуьрмишунин карда бегьерлувилелди зегьмет чlугунай Покачи шегьердин администрацияди адан лайихлувилер са шумудра грамотайралди, чухсагъулдин чараралди къейдна. ВЛКСМ-дин 80 йисан юбилейдихъ галаз алакъалу яз адаз ХМАО-дин Гьукуматдин жегьилрин сиясатдин комитетдин патай Гьуьрметдин грамота, “Жегьилрин арада чlехи кlвалахар тухунай” хурудал алкlурдай лишан гана. Зегьметдин ветерандиз государстводин жуьреба-жуьре къурулушри, тешкилатри ганвай наградайрин кьадар мадни гзаф я.
Ж.Абдуразакьов вичин къастунал кlеви, Ватандин абадвални ислягьвал патал вичелай алакьдайвал зегьмет чlугвазвай лайихлу векилрикай сад я.
“Жалауддин Загьидинович тежрибалу, хъсан крарик кьил кутадай, тешкилатчивилин алакьунар авай къуллугъчи я. Покачи шегьерда адан регьбервилик кваз аялар патал “Соболь” тlвар алай зегьметдин лагерь, “Афгъанистандин ветеранрин Союздин” отделение, жегьилрин жемиятдин “Жегьилриз меслят” кlватlал арадал гъана. Инсанрихъ галаз регьимлувилелди рафтарвал ийизвайвиляй, абурун месэлаяр гьялуник къуьн кутазвайвиляй шегьердин жегьилри адаз гьуьрметзава”, — къейднава Покачи шегьердин кьил Р.З.Халиуллинан чарче.
Къейд ийин, кlвалахдин, сиясатдин месэлайрилай гъейри, Жалауддин Абдуразакьова халкьарин арада дуствални ислягьвал мягькемарунин мураддихъ элкъуьрнавай милли мярекатра датlана иштиракзава, абур тешкилуник кьил кутазва.
Метлеблу кlвалахар кьилиз акъудунин карда Жалауддин Загьидиновичахъ гележегдани сагъвални шадвал, бегьерлувални агалкьунар хьурай!
Гьазурайди — Куругъли Ферзалиев
