Дагъустандин Гьукуматда, дяведин гьерекатар себеб яз, Палестинадай чи республикадиз куьч хьанвай къецепатан и уьлкведин агьалийриз куьмек гунин месэлайриз талукьарнавай совещание кьиле фена.
РикIел хкин, 2023-йисан ноябрдилай инихъ региондиз 207 палестинви куьч хьана. Абурукай 86 касдиз Махачкъала ва Каспийск шегьерра кирида кьунвай кIвалер чара авунва.
Алай вахтунда чи республикадиз куьч хьанвай палестинвийрин 20 хизандиз аялрин пособияр туькIуьрнава. 55 аялди юкьван мектебра чирвилер къачузва, 15 аял бахчайра тербияламиш жезва, 31 жегьилди республикадин вузра кIелзава. Санлай къачурла, палестинвийрикай 13 кас кIвалахдалди таъминарнава.
РД-дин Гьукуматдин Председателдин сад лагьай заместитель Руслан Алиева Дагъустандиз куьч хьанвай палестинвийриз идалай кьулухъни куьмек гунин рекье жавабдар идарайри вири къуватар, мумкинвилер сад авун важиблу тирди къейдна.
«Лезги газет»
