Шак физвайбур тайинарна

Къизляр райондин дежурный частуниз 47 йисан яшда авай чкадин агьалиди, дишегьлиди, вичин ахъазвай машиндиз гьахьна, малум тушир ксари анай аудиосистема чуьнуьхнавайдакай хабар гана. Адаз 35 агъзур манатдин зарар хьана.

Полициядин тади серенжемар кьабулдай къуллугъчийри чкадин 15, 17 ва 18 йисарин яшара авай кьуд жегьил тайинарна ва отделдиз хкана. Абуру чпи авур нагьакьан кар хиве кьуна. Ихитилат авурвал, абуруз няниз машинда аваз куьчейра гьерекат ийиз кIан хьана. И арада, арзачидин машиндин патавай фидайла, ана аваз акур магнитола чуьнуьхун кьетIна. Идалай кьулухъ абур компьютеррин клубдиз фена.

Чуьнуьхай шей полициядин къуллугъчийри вахчуна ва иесидал ахгакьарна.

Телефон къакъудна

Дербентдин ОМВД-дин ПНД-дин инспекторри тайинарнавайвал, и йикъара и шегьердин са мектебдин 8-классдин ученикди, гатада лагьана кичIерар гуналди, вичин тай-туьш гададивай телефон къакъудна.

Агьвалат тарсар кьиле физвай вахтунда хьана. Жегьилрикай сада муькуьдаз хелвет чкадихъ атун теклифна ва виликдай хьайи наразивилерин патахъай ихтилат кудна. Чкадал фейивалди, «ихтилатдик кьил кутурда» кьвед лагьайдан гъиле авай телефон акъудна. Телефон вахце лагьайла, муькуьда адаз еке гьелягьар кьуна.

Чуьнуьхай шей иесидив вахканва. И делилдай силис тухун давам жезва. 

34 ДТП

РД-дин МВД-дин госавтоинспекцияди хабар гузвайвал, 5-октябрдилай 11-ок­тябр­далди Дагъустандин мулкара улакьрин 34 авария арадал атана.

Машинар гьалзавайбуру мукъаятсузвал авунин, къайдайрал амал тавунин нетижада  гьафтедин муддатда 3 кас кьена, 41 касдал (абурукай 4 аялар я) гьар жуьредин хирер-кьацIар хьана.

МВД-дин къуллугъчийри машинар гьалзавайбуруз рекьера гьерекат авунин къайдайрал кIевелай амал авуниз эвер гузва.

"Лезги газет"