35 авария
Улакьар гьалзавайбуру рекьерин гьерекатрин къайдаяр чIурун давам жезва: алай йисан 8-декабрдилай 14-декабрдалди Дагъустандин мулкара 35 ДТП арадал атана. Идакай чаз РД-дин МВД-дин Госавтоинспекцияди хабар гузва.
Гьафтедин къене арадал атай аварийрин нетижада 3 кас кьена, 41 касдал, гьа жергедай яз 3 аялдални жуьреба-жуьре хирер хьана.
Жермейрин кьадар артухарзаватIани, гуьзчивал тухузвай камераяр эцигзаватIани, инсанар кьиникьал гъизвай аварийрин кьадар тIимил жезвач. Полициядин къуллугъчийри рекьера улакьар гьалзавайбуруз мукъаят хьуниз, къайдайрал амал авуниз эвер гузва. Иллаки хъуьтIуьн мишекъат йикъара мукъаятвал артухарун герек я.
Телефонар чуьнуьхна
Махачкъаладин Советский райондин полициядин къуллугъчийри тайинарайвал, Туьбе поселокдин 27 йисан яшда авай агьалиди (дишегьлиди), Махачкъала шегьерда авай, метягьар вахкудай махсус чкадай 4 телефон чуьнуьхна (абурун умуми къимет — 430 агъзур манат). Телефонрин иеси 32 йисан яшда авай итим тир.
Гьакъикъатдай кьил акъудун патал шак физвайди полициядин отделдиз хутахна. Ихтилат авурвал, ам метягьар вахкудай чкада мукьвара кIвалахал акъвазна. Амма кIвалахдалди таъминарзавайдаз адан кIвалахдикай хуш атанач. Имтигьандай акъат тавур, бейкеф хьайи дишегьлиди кьисас вахчун ва гьа са вахтунда пул кьит тирвиляй арадал атанвай вичин хсуси месэлаяр гьялун кьетIна. ИкI, складдай ада гаджетар къачуна ва гьар сад 105 агъзур манатдай маса ксариз маса гана. Хьайи пулуналди ада вичел алай буржар ахлудна.
РФ-дин УК-дин 158-статьядин 2-паюнай (угъривал) уголовный дело къарагъарнава.
Жермедин кьадар артухариз кIанзава
Госдумадин комитетди кресло галачиз аялар таксида аваз санай масаниз тухунай къвезвай жермедин кьадар артухарунин законопроект кьабулнава. Сифтедай ам алай йисан гатуз кьуд лагьай сеферда веревирд авурдалай кьулухъ тестикьарнай. Амма государстводин эцигунрин ва законодательстводин рекьяй Госдумадин комитетди чпи чеб кардал машгъуларзавай таксистри кресло галачиз аялар санай масаниз тухунай къвезвай жерме артухарунин патахъай законопроектдик дегишвилер кухтуна.
Кьилдин ксар патал гила жермедин кьадар 5 агъзур манат хьанва (икьван чIавалди 3 агъзур манат тир), къуллугъдал алай ксар — патал 50 агъзур манат (икьван чIавалди 25 агъзур манат тир), тешкилатар патал — 200 агъзур манат (икьван чIавалди 100 агъзур манат тир). Законопроект сад лагьай сеферда веревирднава. Кухтунвай эхиримжи дегишвилера чпи чеб кеспидал машгъуларнавай таксистар патал тIвар кьунвай жермедин кьадар 5 агъзур манатдал кьван ваъ, 50 агъзур манатдал кьван артухарун теклифзава.
Дегишвилер КоАП-дин 12.23-статьядин 2-паюник кухтун фикирдиз къачунва.
«Лезги газет»
