Угъривилелди бурж ахлудиз кIан хьана
Махачкъаладин полициядин къуллугъчийри дишегьлидив угъриди чуьнуьхай багьа безекар вахкана. Идакай МВД-дин пресс-къуллугъди хабар гузва.
Полицейскийри тайинарайвал, Махачкъаладин 59 йисан яшда авай агьалидин кIвализ ахъа дакIардай угъри фена. Кьве йикъалай шак физвайди тайинарна ва кьуна. Ам 54 йисан яшда авай Каспийскдин агьали я. Ада ихтилат авурвал, шегьердин куьчейра сейр ийидайла, ам умуми гьаятдиз фена ва, ана авай кIвалерикай садан дакIар ахъазваз акурла, анай къенез гьахьна. КIвале авай шкафда итимдиз къиметлу безекар акуна ва абур вахчуна. Иесидиз такурай лугьуз, ам тадиз гьа атайвал дакIардай эхкъечIна. Хиве кьурвал, ихьтин нагьакьан кар ада вичел алай буржар ахлудун патал авуна. Санлай къачурла, безекрин умуми къимет 350 агъзур манат я.
РФ-дин УК-дин 158-статьядин 3-паюнай (угъривал) уголовный дело къарагъарнава.
Яракь вахчуна
Дагъустандин Тлярата райондин полициядин отделдин уголовный розыскдин къуллугъчийри Тлярата хуьруьн 65 йисан яшда авай агьалидин кIвале къанунсузвилелди хуьзвай Калашникован автомат ва адаз талукь 25 патрум дуьздал акъудна. Яракь вахчунва ва экспертизадиз ракъурнава.
МВД-дин къуллугъчийри рикIел хкизвайвал, гуьлле ядай яракьар ва абурун паяр, патрумар къанунсузвилелди хуьзвайбур РФ-дин УК-дин 222-статьядай жавабдарвилиз чIугвазва.
Гьафтеда хьайи ДТП-яр
13-октябрдилай 19-октябрдалди Дагъустандин рекьера 33 ДТП арадал атана. Аварийрин нетижада 6 кас кьена ва 44 касдал (абурукай сад аял я) жуьреба-жуьре хирер хьана. МВД-дин госавтоинспекцияди улакьар гьалзавайбуруз рекьерин къайдайрал амал авуниз эвер гузватIани, чIуру агьвалатар тIимил хьун патал жуьреба-жуьре серенжемар кьабулзаватIани, рекьера арадал къвезвай аварияр тIимил жезвач.
«Лезги газет»
