14 йис тамам хьайидалай кьулухъ гьар са ватандашдиз икьван чIавалди тахьай жуьредин кьетIен ихтиярар хас жезва, гьа са вахтунда жавабдарвални артух жезва. Им ватандашдин гъиле виридалайни важиблу документ тир паспорт гьатзавай яш я.

14 йис хьайидалай кьулухъ вуч ийиз­ жеда ватандашдивай, адаз гьихьтин ихтиярар талукь я?

ЧIехибурувай ихтияр къачун тавуна, вичивай жеда:

– къазанмишай пул, стипендия вичиз кIандайвал харж ийиз ва такьатар картадиз ракъуриз;

– хвавиле кьабулнавай дуьшуьшда и кар къуватдай вегьез;

– жуван ихтиярар хуьн патал суддиз арза ийиз.

Диде-бубадивай ихтияр къачуналди:

– ФИО дегишариз;

– кIелунрикай азад вахтунда официальнидаказ кIвалахиз;

– банкунин счет ахъайиз;

– жува жув кIвалахдалди машгъуларзавайдан дережа къачуз.  

Хиве гьатзавай мажбурнамаяр:

– 14 йисалай – бязи тахсиркарвилерай жавабдарвал: инсан кьиникьай, сагъламвилиз къастуналди еке зиян гунай, инсан чуьнуьхунай, гуж гунай, таланчивал авунай, къачагъвал авунай, террориствилин гьерекат авунай;

– чарадан затI чIурунай вичи эвездин такьатар хгун (эгер вичин хсуси пул бес тежез хьайитIа, и дуьшуьшда амай пай диде-бубади хгуда);

– вичи къачур ва маса гайи затIарин патахъайни вичи жаваб гуда. 

"Лезги газет"