Зи фикирдалди, ашкъидалди, шад­вилелди кIвалахал физ-хтун патал­ инсандин рикI вичи хкягъай пешедал кьадарсуз хьана кIанда. Чи къенин суьгьбет гьахьтин са инсандикай — тамам 25 йисуз четин, амма гзаф герек пешедиз ва­фалу­вал къалурзавай, Р. Османован тIва­рунихъ галай Герейханован 1-нумрадин умуми образованидин юкьван школадин директор Гьажимурадова Мадина Надировнадикай я (шикилда).

– Мадина Надировнадикай рахадайла, инсан, муаллим, тербиячи­ гафар чIехи гьарфарилай кхьиниз ла­йихлу я, – лугьузва райондин обра­зо­ванидин отделдин начальник Ших­бабаев Гьуьсейн Рабидиновича­. – Са рахунни алачиз, ам районда химиядин лап хъсан муаллимрикай, школайрин директоррикай, гьуьр­мет­ авай педагогрикай сад я. Ихьтин­ гьуьр­метни ада вичин яргъал­ йисарин намуслу зегьметдалди, кIвалахда агал­кьунралди къазанмишна.

Мадина Надировна 1969-йисуз Каспийск шегьерда къуллугъчийрин хизанда дидедиз хьана. Буба духтур, диде технолог тир. Хизанда 3 аял авай: Мадинани кьве гада.

М. Гьажимурадовади 1986-йисуз юкьван школа лап хъсан къиметар аваз акьалтIарна. Адахъ музыкальный образование ава: фортепианодин рекьяй музыкальный школани акьалтIарна.

Жегьил руш 1986-йисуз Дагъус­тандин госуниверситетдин химиядин­ факультетдик экечIна, 1991-йисуз анаг яру диплом къачуналди акьал­тIарна. Студент тир йисара ада рес­публикадин ва уьлкведин вузрин арада химиядай кьиле тухвай олимпиадайра шабагьрин чкаяр кьуна.

Вичин рикI алай пешедай зегьметдин рехъ Мадинади Каспийскдин вичи акьалтIарай школада химиядин муаллимвиле кIвалахунилай башламишна.

Эвленмиш хьунихъ галаз алакъа­лу яз кьисметди ам 1992-йисуз Герейханован хуьруьз акъудна. Сифтедай ада инин аялрин бахчада тербиячи яз намуслудаказ кIвалахна.

Хъсан чирвилер авай пешекардиз 1999-йисуз Герейханован 1-нумрадин юкьван школадиз кIелунинни тербиядин рекьяй директордин заместителвилин жавабдар къуллугъ  теклифна. Ина кIвалахзавай йисара Мадина Гьажимурадовади вич яратмишунрин къайдада кIвалахдай педагог, чирвилер, еке дережадин устадвал авай пешекар, кар алакьдай администратор яз къалурна. 2009-йисуз Мадина Гьажимурадова школадин директорвиле тайи­нарна. ЧIехи коллективдин регьбер яз, ада школада хъсан шартIар арадал гъана, педагогрин алакьунар фикирда­ кьуна, абур жуьреба-жуьре кIва­лах­рал желбна.

Дуьз тешкилай кIвалахди хъсан нетижа гудай адет я. Мадина Надировнадин чалишмишвилер ва дурумлу зегьмет себеб яз, школадин муаллимрихъ ва кIелзавайбурухъ гьар йисуз муниципальный, зонадин, рес­публикадин, Вирироссиядин конкурс­ра, килигунра, олимпиадайра­, фестивалра, спортдин акъажунра агал­кьунар жезва. М. Гьажимура­до­вадин регьбервилик кваз школади­ «Учитель года», «Лучший учитель род­но­го языка», «Самый классный классный» пешекарвилин конкурсра иш­тиракзава, хъсан чкаяр ­кьазва.

Чирвилер гунин рекье агалкьунрай школа «Россиядин образованидин кар алай идараяр 2018» сиягьдик кутуна. 2018-йисуз школа «Россиядин школайрин, гимназийрин, лицейрин яратмишунин къайдада кIвалахзавай коллективар» Вирироссиядин ачух смотрдин гъалибчидин медалдиз ва дипломдиз лайихлу хьана.

Школади ДГУ-дин РДО-дихъ галазни сих алакъаяр хуьзва. Анин студентар гьар йисуз мектебда практикада жезва, ина хъсан тежриба къачузва.

Школада алай аямдин инновациядин технологияр уьмуьрдиз кечирмишзава, тербиядин, ватанпересвилин, музейдинни краеведенидин ва маса кIвалахарни виниз тир дережада ава, цIийивилер кардик кутазва.

Химиядин тежрибалу муаллим яз, Мадина Надировнади республикадин семинарра, вебинарра активвилелди иштиракзава, вичин тежриба раижзава.

КIвалахда агалкьунрай кьилин  категориядин муаллим тир Мадина Гьажимурадовадиз РФ-дин образованидин ва илимдин министерстводин гьуьрметдин грамота, «РФ-дин тербиядин ва марифатдин сейли къуллугъчи» хурудал алкIурдай лишан, РД-дин образованидин ва илимдин министерстводин, райондин кьилин, образованидин ­отделдин гзаф кьадар грамотаяр ганва.

Мукьвара РД-дин образованидин­ ва илимдин министерстводи тух­вай образованидин къурулушда кIвалах­­дай регьбервал гудай пешекаррин конкурсда гъалибвал къазанмишай Мадина Гьажимурадовадиз диплом гана­.

– Зун садрани шабагьрин гуьгъуьна хьайиди туш, жува регьбервал гузвай школа акьалтIарай гадайрикайни рушарикай хъсан пешекарар, Ватандиз вафалу инсанар хьун – им зун патал виридалайни чIехи шабагь я, – лугьузва Мадина Надировнади.

РикI алай пешеди хьиз, М. Гьажимурадовадиз къени, гьуьрметлу, низамлу хизандини руьгьдин таъминвал гузва. Ам ферли пуд веледдин диде я. Адан руша Махачкъалада участокдин педиатр, са гадади Моск­вада кардиохирург, кьвед лагьай гадади РД-дин ФОМС-дин юридичес­кий отделда юрист-консультант яз кIвалахзава.

Хазран Кьасумов