1-июндиз, аялар хуьдай международный юкъуз, Дербент райондин Белиж поселокда мини-футбол, волейбол ва баскетбол къугъвадай мини-стадион шад гьалара ачухна.
Ана Белиж поселокдин кьилин везифаяр тамамарзавай Абдулгьамид Ражабова, Россиядин Игит Муслим Муслимован буба Жавад Муслимова, пуд лагьай нумрадин юкьван школадин директор Назлуханум Асалиевади, РД-дин лайихлу муаллим Магьмуд Магьмудова, РД-дин искусствойрин лайихлу деятель Мамедали Агъабалаева, муаллимри, поселокдин школайрин аялри ва диде-бубайри иштиракна.
2025-йисуз, поселокдин активистрин тIалабуналди администрацияди клубдихъ галай 15 сотых чил мини-стадион патал чара авуна. И шад вакъиади ашкъиламишнавай гадайри, стадион жезвай чка къайдадиз гъиз, бегьем кIвалахар кьиле тухвана. Кьиле физкультурадин муаллим, РФ-дин образованидин гьуьрметлу работник Девлетхан Мирзебалаев аваз, са десте ватанпересри азад вахтунда гуьгьуьллудаказ сифте нубатда грейдер гъана, чил дуьзарна, ахпа куьгьне мектебдин чимивал гузвай куьгьне турбайриз шир яна, 6 метр яргъивал аваз атIана, кIватIна. Гьазурай турбайралди стадион элкъвена жугъунда тун патал 100 тIекв акъудна, абур, бетонда туна, мягькемарна. Ахпа 5,5 метр кьакьанвал аваз, элкъвена сеткадин жугъун чIугуна.
Ана мини-футбол, волейбол ва баскетбол къугъвадай майданар ава. Аялар патал туькIуьрнавай и гуьзел чкадиз акъатай харжар мектеб акьалтIарна, гьар жуьре хилера зегьмет чIугвазвай ватанпересри ва муаллимри чпин хивез къачуна.
Гьелбетда, инал кар вилик тухвай фирмайрин ва дестедин иштиракчийрин тIварарни такьуна жедач. Ингье абур: Девлетхан Мирзебалаев, Вагъиф Сефербегов, Рамиз Гьабибуллаев, Эдгар Эрзиханов, Бахтияр Айбатов, Къули Айбатов, Нияз Гьайдаров, СВО-дин иштиракчи Гьажимирзе Ашурбегов, Саид Исакьов, Артур Рамазанов, Рейзудин Темуров, Рагьим Мегьамедов, Гьажи Агъарзаев ва масабур, гьакIни «Отег», «Медиа маркет», «Альянс», «Ласточка» фирмаяр.
Мини-стадион ачухдайла, анал рахай Абдулгьамид Ражабова, Магьмуд Магьмудова, мектебдин диде-бубайрин комитетдин председатель Нияз Гьайдарова, и цIарарин авторди ва масабуру, гуьгьуьллудаказ зегьмет чIугуна, чIехи харжарни авуна, поселокдин аялар патал ихьтин гуьрчег мини-стадион туькIуьрун патал зегьмет чIугур гьар са ватанпересдиз сагърай лагьана.
И юкъуз кIватI хьанвайбурун гуьгьуьлар 3-мектебдин аялри ва муаллимри лагьай манийри, аялрин яратмишунрин кIвалин ва ДШИ-дин аялри авур кьуьлери генани шадарна.
Мини-стадион ачухунин лент А. Ражабова ва Д. Мирзебалаева атIана.
Ахпа сад, кьвед, пуд лагьай нумрайрин СОШ-рин ва спортшколадин командайрин арада мини-футболдай акъажунар кьиле фена. 1-чкадиз – 3-нумрадин СОШ, 2-чкадиз – 2-нумрадин СОШ, 3-чкадиз – 1-нумрадин СОШ лайихлу хьана. Гъалибвилин чкаяр кьур командайрив чеб лайихлу хьайи дережайрин грамотаяр вахкана.
Гуьгъуьнлай мярекатдин тешкилатчийри аялриз ширинлухар, емишар, жуьреба-жуьре ширеяр ва лап хъсан къайдада гьазурнавай дадлу аш алаз туькIуьрнавай столар ачухна.
Халкьдиз хийирлу рекье зегьмет чIугвазвай куьн Аллагьди хуьрай, куь къени крарик мадни берекат акатрай, гьуьрметлубур!
Къагьриман Ибрагьимов
