Ихтияр авайдалай артух, къанунсуз крар авунай вичел шак физвайди тир Мегьамед Желилов судди кlвале дустагъ яз ацукьарна ва Дербент райондин кьилин къуллугъдилай алудна. Республикада СКР-дин СУ-дин векил тир Расул Темирбегован малуматдал асаслу яз, и гьакъиндай «Дагъустан» РИА-ди хабар гузва.

Рикlел хкин, силисчийри гьисабзавайвал, 2015-йисуз Желилова, Дербентдин райондин кьилин везифаяр вахтуналди тамамарзавайди тир вахтунда, вичин ихтияррин сергьятрай экъечlна, хсуси майишатдин кlвалахар тешкилун патал чкадин кьве агьалидин хсусиятдиз гьар садаз 1 гектар майдандин чил гунин къараррал къулар чlугунай. Къанунсуз краралди М.Желилова муниципальный образованидиз санлай къачурла 2,2 миллион манатдин зиян гана.

Гьа икl, РФ-дин УК-дин 286-статьядин 3-паюнин «в» пунктуна къалурнавай тахсиркарвал кьилиз акъудунай, М.Желиловал шак ийизва.

Куругъли Ферзалиев