Зулуз Дагъустанда Россиядин Кьиб­лепатан халкьарин медениятдин ва спортдин фестиваль кьиле фида. РД-дин Гьукуматдин пресс-къуллугъди хабар гузвайвал, гегьенш мярекатриз гьазурвал акунин ва кьиле тухунин тешкиллувилин комитетдин заседание ислендиз Россиядин спортдин министрдин сад лагьай заместитель Одес Байсултанован ва РД-дин Гьукуматдин Председатель Мегьамед Рамазанован регьбервилик кваз кьиле фена.

Россиядин халкьарин садвилин йисан сергьятра аваз, 30-октябрдилай 2-ноябр­далди давам жедай гегьенш фестиваль СКФО ва ЮФО патал йисан кьилин вакъи­айрикай садаз элкъведа. Ана федеральный органрин, абурун хилерик акатзавай тешкилатрин ва уьлкведин са жерге регионрин векилри иштиракун вилив хуьзва.

«Дагъустанда агьалийриз гзаф миллетрикай ибарат регионда яшамиш хьун, жуван адетар хуьн ва гьа са вахтунда сад тир жемият яз амукьун вуч кар ятIа хъсандиз чизва. Гьавиляй фестиваль гьам спортда, гьамни медениятда гьакъи­къатдани гурлуди хьана кIанзава. Мугьманриз Дагъустан акуна, чи адетрихъ галаз таниш хьана, рес­публикадин эйнивални мугьманпересвал халисандаказ гьиссна кIанзава чаз», – лагьана Мегьамед Рамазанова.

Одес Байсултанован гафаралди, уьл­кведа гьар йисан фестиваль цIи 16-сеферда тешкилзава. Къейд авурвал, алай йисуз ам гзаф миллетрикай ибарат ва халкьар дуствилелди яшамиш жезвай Дагъустанда кьиле тухун иллаки лишанлу я.

Малум тирвал, фестивалдик СКФО-да 2010-йисуз кьил кутунай. 2015-йисузни Дагъустанди и мярекатдин иштиракчияр ва мугьманар кьабулнай. «Республикади, гьамиша ва гьар са серенжемда хьиз, фестиваль кьиле тухунин жигьетдай ла­йихлувал къалурнай, гьа жергедай яз – хатасузвал таъминарунин ва мугьманар чкадин медениятдихъ галаз танишарунин месэлайрани… Дагъустанда гьамиша еке шадвилелди кьабулзава. Зун иниз жуван кIвализ хьиз къвезва ва, за фикирзавайвал, масабуруни чеб гьакI гьиссзава», – лагьана РФ-дин спортдин министрдин сад лагьай заместителди Дагъустандикай.

О. Байсултанова зулуз фестиваль ачухунин ва агалунин шад мярекатриз дяведин махсус серенжемдин иштиракчийриз теклифун хъсан яз гьисабна.

Гьазурвилер акун кьиле физвай гьалдикай РД-дин физический культурадин ва спортдин министр Сажид Сажидова их­тилатна. Къейд авурвал, программадик­­ спортдин 10 жуьре акатзава: самбо­, арм­рестлинг, фиджитал-баскетбол, мини-фут­­­бол, волейбол, цIил ялун, чIе­ме­рук­дай­­­ ягъун ва мсб. 

Фестивалдин концертдин прог­рам­май­­ра хорегографиядин «Лезгинка», «Да­­­гъус­тан», «Дагъустандин жегьилвал» ан­самбл­ри­, Дагъустандин филармониядин, операдинни балетдин театрдин манидарри, маса регионрай къведай мугьманри ишти­рак­­да. Махачкъаладин кьилин майдандал Рос­сия­дин Кьиблепатан ва СКФО-дин регионриз талукь кьилдин майданар жеда.

С. Салимов