Дагъустанда багъманчивилин  хиле  агро­агрегациядин сад лагьай проект кардик кутунва. Ада, гъвечIи производствойри гьасилзавай хуьруьн майишатдин суьрсет санал кIватIиз, истемишунрал амал авуналди, ам кьабулун, сортариз ва кьадардиз килигна  паюн, хуьн, метягьдин партияр арадал гъуналди, къапара тун, гьакIни эхиримжи муьштеридив агакьдалди фидай рекьералди (логистика)  таъ­минарун лазим я, хабар гузва РД-дин хуьруьн майишатдин ва недай суьрсетдин министерстводин пресс-къуллугъди.

Проект, Дагъустандин багъманчийрин со­юздин председатель Сайдуллагь Орусха­нован теклифдалди Хасавюрт райондин «Дружба – 2017» СПОК-дин бинедаллаз кьилиз акъудзава. Хуьруьн майишатдин коо­пе­ративда арадал гъанвай къурулушди емишрин суьрсет гьасилунин ва маса гунин кIва­лахар сад ийизва. Майишатди алишвериш­дин «Пятерочка» туьквенрихъ галаз икьрар­ кутӀуннава ва метягь агакьарунин кIва­лах­дивни эгечIнава: сифте кам яз, хутарин чIехи са шумуд партия авуднава, битмиш хьайила, ципицIрин ва хурмадин гьисабдай емишрин жуьреба-жуьревал гегьеншардайвал я.

Сайдуллагь Орусханова гъавурда турвал, «Дружба – 2017» СПОК-дин бинедаллаз агроагрегатордивай са шумуд карханадин суьрсет санал кIватIиз ва ам чӀехи базарриз акъудун таъминариз жедай къайда  арадал гъизва.

«И йикъара чна СтIал Сулейманан райондай емишрин суьрсет гъана. Ам лазим къайдада гьазурна ва алишверишдин сетдиз рекье туна. Хасавюрт районда чна са жерге карханайривай суьрсет кӀватӀнава. Йисан эхирдалди  чна туьквенрив 1,5 агъзур тонн  хутар­, ципицIар, хурмаяр ва маса емишар агакьарун лазим я. Багъманчияр чеб къвезва чи патав, абуруз ихьтин къайда хийирлу я», – лугьузва ада.

Агроагрегатордин кӀвалахдихъ галаз  чкадал таниш хьайи РД-дин хуьруьн майишатдин ва недай суьрсетдин министрдин сад лагьай заместитель Шарип Шарипова регион патал проектдин важиблувал кьетӀенди тирди къейдна. Ада рикӀел хкайвал, 2020-йисалай 2026-йисалди республикада 900 гектардилай виниз майданра къене цил авай  жуьредин емишрин багълар кутунва,  хутар гьасилунин кIвалахни активнидаказ вилик физва.  И рекьяй  Дагъустан Россияда кьвед лагьай чкадал ала. Гьа са вахтунда агроагрегатор  суьрсет гьасилзавай  кас ва ам маса гунал машгъул алишверишдин  сеть алакъалу ийизвай  гьалкъа жезва.

«Гзаф вахтара гъвечӀи майишат­диз, адет яз, маса кас галачиз, алишверишдин чIе­хи туьквенрихъ галаз алакъалу жедай вахт ва  мумкинвилер бес жезвач. Гьавиляй агроагрегатордин вилик квай везифа майи­шатри гьасилнавай суьрсет маса гуз куьмек гуникай, ам дезгейрал акъудиз гьазуруникай, суьрсетдин лазим тир кьадар ва ери  таъминаруникай ибарат я», – гьисабзава Шарип Шарипова.

Идалайни гъейри, агроагрегациядин къайдади муьштерийриз ватандин мулкунал гьасилнавай  емишрин ерилу  суьрсет ишлемишдай рехъ ачухзава ва республикадин хуьруьн майишат вилик тухунин карда цIийи мумкинвилер, гьевес арадал гъизва, алава хъувуна министрдин сад лагьай заместителди.

Жасмина Саидова