«Озвучка» ийидай кас жагъурзава

«Пак Къуръан ва адан манайрин таржума лезги чIалал» ктаб (таржумачи — диндин алим Ямин гьажи Луткунви) гьакъидихъ «ванциз къачудай» (аудиоозвучка) ийидай кас (итим) герекзава. Идахъ галаз алакъалу яз, чна лезги чIал хъсандиз чидай, гъавурда акьадайвал кIелиз жедай ксаривай майдандиз экъечIун, чпикай хабар гун тIалабзава. И кар гъиле кьаз кIандай кас хьайитIа, къуй ам, чешне яз, сифте интернетдай Къуръандин аятрин манаяр урус чIалалди «ванциз къачунвай» (аудиоозвучка) авунвай жуьредиз килиграй, хъсандиз и кIвалахдин гъавурда жедайвал.

Эвелдай чна и кардал машгъул жез гьазур тир касдив, адан алакьунар ахтармишун патал, аудиоозвучка ийидай са кьадар материалар вугуда. КIвалахдал желб авур, яни и кар патал хкягъай, кас талукь тир техникадалдини таъминарда. КIвалах жуван кIвалени кьилиз акъудиз жедайди я.

КIвалахдай гузвай гьакъидин ва и кардиз талукь маса делилар тамамдиз чирун патал 8-989-653-42-35 нумрадиз (ватсапдиз) кхьиз жеда.

Алава къейд: Къуръандин аятрин манаяр лезги чIалалди аудиоозвучка авунин  кьилин макьсад лезги халкьдив Ислам дин агакьарун я, Ин ша Аллагь! И карди, дин агакьар­унихъ галаз санал, чIал хуьнизни куьмек гуда. Иллаки къецепатан уьлквейра яшамиш жезвай са бязи лезгийривай лезги чIалалди кIелиз тежезвай дуьшуьшарни хьун мумкин я, ихьтин вахтара абурувай аудиоозвучкадихъ яб акализ, хайи чIалал Къуръандин аятрин манаяр чириз жеда. ГьакIни «латиницадалди» кхьиз, кIелзавай са бязи чкайра, мумкин я «кириллицадалди» кхьенвай лезги ктабар кIелиз тахьун — ихьтин дуьшуьшрани ауидоозвучка авунвай лезги ктабрикай абуруз куьмек жеда.

«Пак Къуръан ва адан манайрин таржума лезги чIалал»

ктабдин редколлегия