2017-йисуз Дагъустанда 15 агъзур гьайвандиз чка жедай 20-далай артух малдарвилин фермаяр ишлемишиз вахканва, хабар гузва РД-дин хуьруьн майишатдин ва недай суьрсетдин министерстводи. Абурун арада гьакIни малдарвилин хизанрин фермаяр тешкилун патал къачунвай грантрин сергьятра аваз эцигнавай карханаярни ава.
Чешмеди хабар гузвайвал, фермаяр Къизилюрт, Тарумовский, Къарабудахкент, Къули, Сергокъала, Бабаюрт ва маса районра арадал гъанва.
Идалайни гъейри, йиса санлай къачурла 10 агъзур тонн нек гьялдай ва некIедикай суьрсет гьазурдай 5 цех, йиса 2,5 агъзур тонн як гьялдай ва малар тукIвадай 3 цех эцигунин кIвалахар куьтягьнава. Идалайни гъейри, са жерге муниципалитетра йиса 460 агъзур бройлер хуьз жедай къушчивилин 5 объект, гьакIни какаяр хадай 120 агъзур верч хуьз жедай ва са сятда 3 агъзур верч тукIвадай мумкинвал авай 3 цех эцигнава ва ишлемишиз вахканва.
РД-дин хуьруьн майишатдин ва недай суьрсетдин министрдин везифаяр вахтуналди тамамарзавай Керимхан Абасова къейд авурвал, Дагъустанди некIедин ва некIедикай авунвай продуктрин къенепатан игьтияжар 85 процентдин, якIун ва якIукай гьазурнавай недай суьрсетрин — 58 процентдин, верчерин какайрин лагьайтIа — 30,7 процентдин таъминарзава.
Ада гъавурда турвал, якIалди ва якIун суьрсетдалди таъминвал агъуз хьун як гьялунин ва якIукай продуктар, гьа жергедай яз дулдурмаяр гьазурунин кIвалахар зайифдаказ тешкилунихъ галаз алакъалу я. “Гьакъикъатда Дагъустан дезгейрал гьар юкъуз малдин, лапагрин ва верчерин таза як пайда жезвай тIимил тир регионрикай сад я. Дагъустандин пуд майишатди — “Агросоюз” СпоК-ди, “Кизляр Урицкий мясокомбинат” ООО-ди ва “Махачкъаладин мясокомбинатди” — 2018-йисуз 7 агъзур тонндилай артух лапагрин як Ирандив агакьарунин гьакъиндай кутIуннавай икьраррини и кар субутарзава. Мажбурнамаяр кьилиз акъудунин сергьятра аваз и карханайри 2017-йисуз Ирандиз 228 тонн як рекье тунва”, — лагьана министрдин везифаяр вахтуналди тамамарзавайда.
К.Абасова хабар гайивал, 2018-йисуз малдарвилин хиле акъудзавай суьрсетдин кьадар артухарунин кIвалах давамарда. Кьилди къачуртIа, 15 агъзур гьайван хуьз жедай МТФ-дин мад 20 ферма, ири карч алай 1200 мал ва 30 агъзур лапаг куькардай 7 майдан эцигунин ва цIийикIа туькIуьр хъувунин кIвалахар куьтягьун пландик кутунва.
«Лезги Газет»
