Педагог, «Дагъустан Республикадин­ лайихлу муаллим», Россиядин писателрин союздин член Гъулангерек Ибрагьимова кIелдайбуруз фадлай хъсан шаир хьизни малум я. Икьван гагьди ­абурув шаир­дин «Гатфа­рин­ ава­зар»­, «КIанда­ заз рагъ», «ТIе­би­­атдин къужах­да», «Ди­деяр хуьх», «Ви­лив хуьн», «Суьгьуьрдин ахвар», «Уьмуьр амай кьван» кта­бар­ агакьна. КIел­за­­вайбуру датIана Ибрагьимовадин­ чIа­лариз теснифнавай маний­рихъ­ни яб акалзава. Газетриз­, журналриз­ акъат­­завай­ адан шиирарни кIел­за­­ва. Абуру яратмишзавай касдин алакьунриз, бажарагъдиз ла­йихлу къиметни гузва.

И мукьвара Дагъус­тандин ктабрин изда­тельстводи шаирдин «Лувараллаз­ бахтарин» нубатдин ктаб акъуднава. Ана эхиримжи йисара кхьенвай эсерар гьатнава­. Гуь­зел тIебиатдикай, ватанпересвилин руьгь­ди­кайни къуватдикай, Ватан­дин вилик хва­вилин-рушвилин буржи вини дережада­ кьилиз акъудуникай, аялрин­ аламатдин алемдикай, михьи, гуьзел кIа­нивилин гьиссерикай, уьл­кведа, дуьньяда ва инсанрин уьмуьрда­ кьиле физвай гьаларикай, худож­никдин вилериз ­аквазвай хъсан ва пис шикилрикай теснифнавай гьар са шиирди кIел­завайдав фикир ийиз, гекъигиз, веревирд ийиз ­тазва.

Махачкъаладин, Дербентдин диндин идарайрал террористри гьужум авур нагьакьан вакъиа негьзавай «Игитриз бахшзава» шиирдин бендерини и кар тестикьарзава:

Вакъиаяр жеда жигер ифидай,

Гьич садрани рикIелайни тефидай.

Цуькверилай агъу кIватIда иланри,

ЧIижери - вирт, атирарни – инсанри.

Уьмуьрдайни сада кьазва къенивал,

Садни физва ата-пата, кIанивал…

Ктабда шаирдин са шумуд поэмани ганва.

Абад  Азадов