Луткунрин тарихдикай
ЦIийи ктаб
Мукьвара Махачкъалада, «Лотос» чапханада, «Луткун: тарихдин чинар» ктаб чапдай акъатнава. Диндин алим Ямин Мегьамедова гьазурнавай и ктабда Ахцегь райондин чIехибурукай сад тир Луткунрин хуьруьн тарихдикай куьруь малуматар ва 1865, 1873, 1886-йисара кьиле фейи переписрин делилар, гьакIни хуьруьн шикилар гьатнава.
Авторди къейдзавайвал, лезги хуьрерикай, абурун тарихдикай гьазурзавай гьар са ктабдихъ милли ирс хуьнин карда еке метлеб ава. Абур гележегдин несилрал хейлин делилар, малуматар агакьарзавай кьилин чешмеяр хьиз кьабулиз жеда.
Ктабда гьатнавай переписдин делилар надир малуматар я. Абурун куьмекдалди гьар са луткунвидивай, са шумуд несилра яшамиш хьайи чIехи бубайрин тIварар чирна, тухумрин тарар арадал гъиз жеда. Жуван тухумдин, хизандин, хуьруьн тарих чир хьун, ам пакадин несилрал агакьарун, хайи чIал хуьн гьар са ватанпересдин эвелимжи буржийрикай я. Луткунрин хуьруькай гьазурнавай хьтин ктабри и карда чаз куьмекзава.
«Луткун: тарихдин чинар» ктаб маса гузвай къимет 1500 манат я. Махачкъалада ам «Лезги газетдин» редакциядай (телефондин нумра: 8928-584-16-72), Ахцегь районда Луткунрин хуьре (телефондин нумраяр: 8928-831-54-90; 8928- 554-70-86) маса къачуз жеда.
* * *
Алай вахтунда, Алкьвадар Гьасанан тIварцIихъ галай медениятдинни марифатдин центрадин «Лезги хуьрер» проектдин сергьятра аваз, «Ахцегь район: тарихдин гелерай» тIвар алай ктаб чапдиз гьазурзава. Ана Ахцегь райондик акатзавай вири хуьрерин тарихдиз талукь макъалаяр, шикилар ва 1865, 1873, 1886-йисарин переписдин делилар гьатда. Ктаб акъудун патал пулдин куьмек герекзава. Центрадин векилри Ахцегь райондай тир, мумкинвал авай стхайривайни вахаривай и карда иштиракун тIалабзава. Алакъадин нумра: 8928-584-16-72.
Агьмед Магьмудов