8-мартдиз Москва шегьерда гьар йисуз рамазандин вацра тешкилзавай лезги жемятдин ифтар кьиле фида. Ана уьлкведин меркезда яшамиш жезвай ватанэгьлийривай чпин хизанарни галаз иштиракиз жеда.
ФЛНКА-дин телеграм-каналди хабар гузвайвал, мярекат, кьиле Тагьир Гьажимирзоев аваз, Москвада кардик квай «Меркездин лезгияр» тIвар алай тешкилатди РД-дин муфтиятдин векилрин куьмекдалди тешкилзава.
Диндин межлисдин сергьятра аваз Къуръан кIелда, нашидар лугьуда, диндин алимар рахада, иштиракчийрин арада викторина кьиле тухуда, жуьреба-жуьре савкьатар къугъвада. Къейд ийин хьи, кьилин пишкеш яз, умрадиз фидай кьве путевка къугъвадайвал я. Ифтардиз талукьарнавай мярекат Султан Трамова кьиле тухуда, нашидар Заур Салигьова тамамарда.
Тешкилатчийри хабар гузвайвал, ифтардиз къвезвайбур патал чара авунвай чкайрин кьадар сергьятламишнава. Аниз къвез кIанзавайбурувай телефондин +7 926 336 91 74 нумрадиз зенг ийиз жеда. Мярекат Москва шегьердин и адресда кьиле фида: ул. Гарибальди, д. 4Г, м. Новые Черёмушки (выход №5).
Чи мухбир
