Кьеан СтIал Сулейманан райондин гадарнавай, яни касни яшамиш техжезмай хуьрерикай сад я. Ам арадал атай вахт, тIварцIин мана-метлеб малум туш. Хуьр Хутаргърин патав экIя хьанва. Терг жедалди вилик ам Аламише хуьруьн советдик квай. 

Агьалияр асул гьисабдай гьайванар хуьнал, лежбервилел машгъул тир. 1886-йисан переписдин делилралди, хуьре 60 майишат ва 325 агьали (178 итим ва 147 дишегьли) авай. 1929-йисуз Кьеанрин хуьре 76 майишат хьана, и девирда хуьр Хутаргърин хуьруьн советдик акатзавай.

1968-йисуз кьеанвияр яваш-яваш арандиз – Аламишедиз – куьчарунин къарар кьабулна. 1976-йисуз хуьр тамамдиз Эминхуьруьз (а чIаван Аламишедиз) куьчарна.

Мурад Мегьамедкеримован

«СтIал Сулейманан район: ­тарихдин гелерай» ктабдай.