СтIал Сулейманан райондин ХпитIрин хуьруьн тIварцIин мана-метлебдикай пешекарри лагьанвай фикирар малум туш. Хуьр арадал атай вахтни чизвач.

И хуьруькай сифтегьан малуматар алимриз Кьурагьрин куьгьне мискIиндин цлан къванцел алай кхьинар кIелдайла чир хьана. Кьилди къачуртIа, Кьурагьрин жемиятдин (общество) часпаррикай баянар гудайла, ХпитIрин регъуькайни ихтилат фенва.

ХпитIрин хуьре НитIрекьушун, Какар, Сумар, Чапинар ва ЦIахар тIварар алай тухумар ава. Агьалияр малдарвилел ва хуьруьн майишатдин маса хилерал машгъул жезвай, кеспи ийиз шегьерризни физвай.

1886-йисан переписдин делилралди, ХпитIрин хуьре 51 майишат ва 304 агьали (167 итим ва 137 дишегьли) авай.

Гьеле Октябрдин инкъилабдалди нубатдин залзаладилай кьулухъ 1914-йисуз хуьр виже текъведай гьалдиз аватна, а чIавуз агьалияр маса чкадал куьч хьуниз мажбур хьана. Кутугай чка лагьайтIа, патав гвай дагъдал алай дуьзен майдан тир.

1966-йисан гужлу залзаладилай кьулухъ хпитIарвияр кьвед лагьай сеферда куьч хьуниз мажбурна – Эминхуьруьз, арандиз.

Мурад Мегьамедкеримован

«СтIал Сулейманан район: ­тарихдин гелерай» ктабдай.