Бигер (БикIер) СтIал Сулейманан райондин исятда амачир хуьрерикай сад я. Виликдай ам Хутаргърин хуьруьн советдик квай. 1969-йисуз анин агьалияр чи йикъарин Эминхуьруьз куьчарна. Малум тирвал, ина маса хуьрерин агьалийрини бине кутунва.

Бигер хуьр арадал атай вахт, адан тIварцIизни якъин баян ганвай чешме чаз малум туш. ЧIалан алим А.Гуьлмегьамедован «Лезги чIалан словарда» «бигер» гафуниз ихьтин баян ганва: гьакъисуз ийизвай мажбури кIвалах.

Дагъустан Россиядин империядик экечIдалди вилик Бигер хуьр Куьре ханлухдин Къутур-Куьре магьалдик акатзавай. Ханлух Россиядин империядик акатайдалай кьулухъ Бигер Дагъустан вилаятдин Куьре округдин Къутур-Куьре наиблухдин Ялцугъ хуьруьн жемиятдик квай.

1886-йисан переписдин делилралди, Бигерда 25 кIвал ва 267 инсан (93 итим ва 174 дишегьли) яшамиш жезвай. Куьчардалди вилик хуьре кIвалерин кьадар 35-дав агакьнавай. 1939-йисуз и хуьре 182 агьали яшамиш жезвай.

Советрин девирда ина «ЦIийи дуьнья» тIвар алай колхоз кардик квай. 1966-йисуз хьайи залзалади хуьр чукIурна. Масаниз куьчарунин себебни залзаладин чIуру нетижайрихъ галаз алакъалу я.

Мурад Мегьамедкеримован

«СтIал Сулейманан район: ­тарихдин гелерай» ктабдай.