20-майдиз Каспийскдин «Анжи-Арена» майдандал Махачкъаладин «Анжи» ва Красноярскдин «Енисей» командайрин арада футболдин матч кьиле фена. Идакай «Лезги газетдиз» LezgiSport.com сайтди хабар гузва.

Премьер-лигада амукьун патал махачкъалавийри пудалай тlимил тушиз «Енисей» командадин варариз тупар ягъун ва чпи са тупни ахъай тавун герек тир. Къугъун «Анжидин» хийирдиз 4:3 гьисабдалди куьтягь хьанат1ани, махачкъалавийриз Россиядин лигада къугъвадай мумкинвал жедач.

Къейд ийин, «Енисей» командада лезги футболист Сердер Сердеров къугъвазва, къугъунин 84-декьикьада акси командадин варариз яна. Сердер Сердеров сифтедай «Анжи» командадик квай лезги футболист тир.

Красноярскдин футболдин клубда мад са лезги футболист – Азим Фатуллаев – агалкьунралди къугъвазва.

Гьа икl, лезги футболистар тир Азим Фатуллаевни Сердер Сердеров «Енисей» командадик кваз къведай сезондилай Россиядин премьер-лигада иштиракда.

«Лезги газет»