Чна виликамаз хабар гайивал, 15-ноябрдиз Ахцегьа авай спорткомплекс­да 2012-2013-йисара дидедиз хьайи жаванрин арада азаддаказ кьуршахар кьунай республикадин 4-турнир кьиле фена.

Махачкъала, Каспийск, Дербент, Избербаш шегьеррайни Ботлих, Къарабудахкент, Къаякент, Мегьарамдхуьруьн, СтIал Сулейманан, Кьурагь, Докъузпара, Рутул ва Табасаран районрай тир спортсменри гьасиррал чпин устадвал къалурай акъажунар, виликан сеферра хьиз, гилани хъсан тешкиллувал аваз кьиле фена. Дугъриданни, и югъ спортдин халис сувариз элкъвена. Ам тешкилнавай мергьяматлувилин «Леки» фондуниз ва Ахцегь райондин администрациядиз спортсменрини тренерри, гьамни бягьсериз тамашиз атанвайбуру сагърай лагьана. Спортсменри, чпин нубатдай яз, къизгъин бягьсер багъишна. Нетижада Ахцегьрин А. Гъаниеван тIварунихъ галай ДЮСШ-дин спортсменрин команда 1-чкадиз ва Кубокдиз лайихлу хьана.  3-нумрадин СШОР-дин ва Каспийскдин командайри, талукь тирвал, 2 ва 3-чкаяр кьуна.

Спортдин мярекатдин макьсад азаддаказ кьуршахар кьун машгьур авун, ­жаванринни аялрин устадвал ва тежриба хкажун, республикадин жуьреба-жуьре районрай тир спортсменрин арада дуст­вилин алакъаяр мадни мягькемарун тир.

И макъаладихъ галай шикилдин куь­мекдалди, «SilicaAR» приложение кутуна, турнирдиз талукь видеодиз килигиз жеда.  

Рагнеда Рамалданова