Загранпаспортар, виликдай хьиз, гилани кьве жуьрединбур гузва: куьгьне ва цIийи. Абурун арада авай тафават ишлемишиз хьунин муддатдихъ, къиметдихъ ва мумкинвилерихъ галаз алакъалу я.
Кьилди къачуртIа, куьгьне жуьредин загранпаспортдихъ 5 йисан вахтунда къуват жеда, ана 14 йис тамам жедалди яшара авай аяларни кхьизва. И паспорт къачун патал 2 агъзур манат госпошлина тайинарнава (аялар патал – 1 агъзур манат).
ЦIийи жуьредин паспорт 10 йисуз ишлемишиз жеда. Аялар кхьизвач, амма 12 йисалай виниз яшара авай аялрин тупIарин гелер эцигзава. ЧIехибур патал госпошлинадин кьадар 6 агъзур манат я, аялар патал – 3 агъзур манат.
ЦIийи жуьредин, яни вичихъ 10 йисан муддатда къуват жедай паспортдихъ авай артуханвилер ихьтинбур я: адаз талукь шикил МФЦ-дин идарада язава (жув шикил гваз финин чарасузвал авач); къене тунвай чипди гуьзчивал тухудай махсус чкайра ахтармишунар фад-фад алудда; хсуси делилар мадни мягькемдиз хуьда.
Загранпаспорт туькIуьрун патал арзачидив РФ-дин ватандашвилин паспорт ва къуватда авай загранпаспорт (аваз хьайитIа ва ам ишлемишунин вахт акьалтIнавачтIа) хьана кIанда.
«Лезги газет»
