Дагъустанда къати марфар къунин нетижада еке зиянар хьайи мулкарикай сад Хасавюрт район я. Ина тамам пуд хуьр – Адиль-отар, Къадир-отар ва Тутлар – тамамдиз цик акатна. Идалай гъейри, рекьер-хуьлер къайдадикай хкатна, муькъвериз зиянар гана. Гена инсанрин арада телефвилер хьанач.
Хасавюрт райондиз яд акьалтунин нетижада хьайи зиянрикай телеканалрай, СМИ-рин маса чешмейрай гзаф малуматар гана. Гьавиляй абур тикрар хъувунин лазимвал авач. Амма газет кIелзавайбуруз и райондин мулкунал алай лезги хуьре – Къурушдал – гьихьтин гьалар арадал атанватIа итижлу хьун мумкин я.
Санлай къачурла, Къурушрин хуьруьз виле акьадай хьтин зиянар хьанач. Къвайи къати марфари жемятдин эменнидиз куьлуь-шуьлуь зиянар гайи, кIвалерин гьаятриз, цурриз, муьхцериз ятар фейи майишатар авазва. Амма яд акьалтуникди яшайишдин кIвалерин цлар чкIай, инсанриз еке зарар-хасаратвилер хьайи дуьшуьшар авач.
Райондин мулкунал зарар гьисабдиз къачунин ва агьалийриз куьмек гунин серенжемар давам жезва.
Муса Агьмедов
