Лугьуда хьи, гьар са касди кечирмишзавай уьмуьрдин рекьериз яшарин кьадардиз килигна ваъ, тамамарзавай баркаллу крарал бинеламиш хьана къимет гуда. Гьуьр-метдиз лайихлу рухваярни рушар Хасавюрт райондин Къурушрин жемятдин арадай вишералди акъатна. ЧIехи несилрин  баркаллу рехъ алай вахтунда акьалтзавай несилдин векилрини лайихлудаказ давамарзава. Ахьтинбурун жергедай я и хуьруьн имам Панагьов Азим гьажи Асланан хва. Ада тухузвай кIвалах ислам диндин гьакъикъи къайдаяр халкьдив, иллаки жегьилрив агакьаруникай, абуруз писдини хъсанди, гьалални гьарам чируникай ибарат я. ГьикI хьи, диндин гъавурда дуьз акьун тавурла, чIуру къуватрин таъсирдик акатзавайбур гзаф дуьшуьшра жегьилар я. Абурукай бязибур интернетда чIуру рехъ дуьзди яз къалурунин таблигъат тухузвай шаклу чешмейрихъ, цIал­цIам гафарихъ агъазва. Каспийск шегьердин аэропортуна хьайи вакъиаяр рикIел хкин.

Азим гьажиди мумкинвал хьайи гьар са дуьшуьшда — диндин межлисрал, жуьмя йикъан вязер ийидайла, собранийрал  —  жегьилар гъавурдик кутунин кIвалахдиз артух фикир гузва. Ада хуьре тухузвай кIвалахар гзаф я. КIеве авайдаз гъил яргъи ийизва, чIур хьанвай муькъвер-рекьер цIийи хъийизва ва икI мад. Азим гьажи кьиле акъвазна, хуьре эцигнавай, рагьметлу шагьид Хидиров Мугьаммад гьажидин тIварцIихъ янавай мискIин хьтинди неинки хуьрера, гьатта бязи шегьеррани авач ­жеди.

Къурушрин хуьруьн 1-нумрадин А. Ай­думован тIварунихъ галай мектебдихъ спортзал авачиз саки 20 йис жезва. Аялар, гад-кьуьд, марф-жив талгьана, гьаятдани классра тухузвай физкультура­дин тарсарал дуьздаказ машгъул жедай мумкинвилерикай магьрум хьанвай. Къурушар Хасавюрт районда лезгияр яшамиш жезвай чIехи хуьрерикай сад я. Аниз бязи ­чиновникриз фикир гудай мажал авачир хьиз я. Гьаниз килигна, Азим гьажиди са юкъуз хуьруьн жемят кIватIна, 1-нум­радин мектеб патал жемятдин куьмекдалди алай аямдин истемишунрив кьадай спортзал эцигунин месэла кудна. Вирида адан ­тереф хвена. Пакадин юкъуз Азим гьажиди вичин куьмекарни галаз герек тир техника чкадал гъана, спортзалдин хандакIар яна. Сад-кьве йикъалай абур ацIурна. Алай вахтунда анал 20 агъзур керпич хканва. УстIарар тир Османов Мевлидинни Агьмедов Аллагьверди цлар хкажунив эгечIнава.

Азим гьажидин гафарай мадни чир хьайивал, спортзал хуьруьн жемятдин, гьакI патара авай хуьруьнвийрин куьмекдалди эцигда. Пландик кьве зал, аялриз, муаллимриз кьилдин кабинетар, парталар дегишардай кабинаяр ва маса къулайвилерни ква.

Ваз Аллагь куьмек хьурай, гьуьрметлу Азим гьажи. Вуна чIугвазвай зегьметрай Сад Аллагьди ваз сувабар гурай! — алхишзава адаз чна.

Гьажи  Къазиев,

Дагъустандин лайихлу муаллим