Играми «Лезги газет», газетдин сайт кIелзавай ватанэгьлияр! 27-майдиз мусурманрин жемиятди Къурбанд сувар къейдзава.

Суварин лишанлу вакъиайрикай сад гьайван тукIун (къурбанд авун) я. И ибадатдай чIехи суваб авайди хейлин гьадисайрини тестикьарзава. Мисал яз са гьадисда лугьузва (мана):

«Адаман несилри Къурбанд суварин юкъуз ийизвай Аллагьдиз виридалайни кIани амал иви экъичун (гьайван тукIун) я…» (Ибн Мажагь — 3126).

Къурбанд суварихъ галаз алакъалу яз Дагъустанда пуд югъ – 27, 28, 29-май – кIвалах тийидай йикъар яз малумарнава. Талукь къарардал РД-дин Гьукуматдин Председатель Мегьамед Рамазанова къул чIугуна.

Къуй гьар са мусурманди ийизвай къурбандар, дуьаяр, кьазвай садакьаяр Аллагьди кьабулрай! Дуьньяда – ислягьвал, рикIера – къенивал, кIвалера – берекат, мецел – ширин гаф, кьилел михьи цав хьурай!

Меккедиз фенвай чи стхайрин, вахарин ниятар, гьаж Аллагьди кьабулрай. Чи рикIера авай экуь мурадриз дуьнья акурай! Къурбанд сувар мубаракрай, играмибур!

«Лезги газетдин» редакциядин коллектив