И йикъара Кьурагьрин 1-нумрадин СОШ-дин спортзалда Кьурагь райондин ФС-дин ва ДМ-дин отделди пневматический винтовкадай лишан ягъунин командайрин ва кьилдин иштиракчийрин конкурс кьиле тухвана.

Чlехи гъалибвилин мярекатар кьиле тухунин пландин ва ВИЧ инфекциядин вилик пад кьунин «Чир хьун лазим я» акциядин сергьятра аваз тухвай акъажунра Кьурагь райондин 1 ва 2-нумрайрин мектебра кlелзавайбуру иштиракна.

Акъажунар гатlундалди вилик ЦРБ-дин духтур Жамалдин Рамазанова иштиракчийриз жуван ва багърийрин сагъламвилин жавабдарвалунин, хатасузвал арадал гъунин жигьетдай информация гана.

Цlуд касдикай ибарат (5 гада ва 5 руш) командайри ацукьна ва ярх хьана 10 метрдин мензилдай лишан яна.

Конкурсдин къайдадикай ФС-дин ва ДМ-дин отделдин начальник Рамиз Рамазанова суьгьбетна. Пуд сятда давам хьайи акъажунрин нетижада 2-нумрадин «Спринт» командади 1-чка кьуна. 2-чка Кьурагьрин 1-нумрадин СОШ-дин «лидер» командади къачуна.

Гуьгъуьнлай кьилдин иштиракчийрин арадани акъажунар кьиле фена.

Гъалибчиярни хъсан чкаяр кьурбур райондин ФС-дин ва ДМ-дин отделди

пишкешралди ва грамотайралди къейдна. Итижлу мярекатр иштиракчийрин рикlел аламукьдайди хьана.

«Лезги газет»