Эхиримжи йикъара къвайи хар галай къати марфари Кьурагь райондин рекьериз , кIвалериз, салариз гзаф зиянар ганва. Кьурагьрилай агъадихъ галай рехъ къайдадикай хкатна, салара цанвай майваяр барбатIна. Кьурагьрилай винидихъ галай хуьрериз хъфизвай рекьин участокарни селлери чIурнавай. Райондин рекьерин идаради улакьрин гьерекатдиз манийвилер гузвай татугайвилер арадай акъуднава. Рекьер тамамдиз къайдадик кухтунин кIвалахар давам жезва.
Кьиле рекьерин 23-нумрадин ДЭП-дин начальник Мегьамед Агьмедов авай бригадади чпин вири къуватар саднава.
Къати марфар къунин нетижада иллаки еке зиянар Хпеж дередин хуьрериз хьанва. КIамарал алай 4 муьгъ, Шимихуьруьн данаяр, Хпежрин малар, рекьел акъвазарнавай машин, чархар тухванва. Агьалийрин салариз, векьер язавай уьруьшриз зиянар ганва. И хуьрериз 10-июлдин экуьнахъ Кьурагь райондин кьил Замир Азизов фена. Газет чапдиз вахкузвай чIавуз хьанвай зиянрикай тамам делилар агакьнавачир. Гегьенш материал къведай нумрада жеда.
Алван Рамазанова
