РД-дин здравоохраненидин министрдин заместителвиле медицинадин къуллугъдин подполковник, Украинада кьиле физвай махсус серенжемдин иштиракчи, бине Гуниб райондай тир Мегьамед Валихов тайинарнава. Талукь документдал Дагъустандин Гьукуматдин Председатель Абдулмуслим Абдулмуслимова къул чIугуна.
31-мартдиз РД-дин Гьукуматдин Председателдин заместитель Абдурагьман Магьмудова министерстводин коллектив министрдин цIийи заместителдихъ галаз танишарна. Ада къейд авурвал, Мегьамед Валихова Ватандиз къуллугъ авунин карда акьалтIай кьегьалвилер къалурна ва медицинадин рекьяй адахъ авай тежрибади республикадин здравоохраненидин къурулуш вилик тухуз куьмекда.
Мегьамед Валихов Россиядин Президент Владимир Путинан теклифдалди кардик кутур «Время героев» программадин иштиракчи я. Адахъ «Жуьрэтлувиляй» пуд орден, «Ватандин вилик лайихлувилерай» ордендин II дережадин медаль, «Дирибашвиляй» орден ава. 2025-йисан июлдин вацралай медицинадин къуллугъдин подполковникди РД-дин Кьил Сергей Меликован регьбервилик кваз гьукумдин органра кIвалахунин рекьяй чирвилер къачуна ва гуьгъуьнлай тежриба хкажун патал ам республикадин здравоохраненидин министерстводиз рекье туна.
Министерстводин коллективдихъ галаз кьиле фейи гуьруьшдал цIийи заместителди къейд авурвал, адахъ къурулушда дегишвилер твадай къаст авач, адан фикир пешекар къуллугъчийрихъ галаз санал кIвалах вилик тухун я. «Куь коллективда санал кIвалахдай мумкинвал хьунал за дамахзава. Саналди кIвалахуни чаз хъсан нетижаяр къазанмишдай мумкинвални гуда», – лагьана ада.
Агьмед Магьмудов
