18-20-октябрдиз Москвада, спортдин «Динамо» Академияда, женгинин какахьай единоборствойрай (ММА) Россиядин Кубок патал акъажунар кьиле фена. Ана уьлкведин 31 региондай тир спортсменри заланвилин са шумуд категориядай чпин устадвал къалурна. Абурун арадай яз, чи ватанэгьли, алай вахтунда Махачкъалада яшамиш жезвай Арсен Сулейманова 93 кг-дал къведалди заланвал авайбурун арада гъалибвал къазанмишна. Финалда бамишардай къайда ишлемишай адаз Арслан Гьажиев (ХМАО-Югра) вахт амаз кумукьна, гъалибвал къазанмишун патал чи ватанэгьлидиз са декьикьадилайни тIимил вахт лазим атана.
Чаз авай малуматралди, А. Сулейманов ММА-дай хейлин турниррин ва акъажунрин гъалибчи я. Кьилди къачуртIа, алай йисан майдиз 18-20 йисарин яшда авай жегьилрин арада Россиядин кIвенкIвечивал патал Калугада кьиле фейи акъажунра ам къизилдин медалдиз лайихлу хьана. Алай вацран эвелра, Кабардино-Балкариядин 1-президент В. М. Кокован экуь къаматдиз бахшна, Нальчикда кьиле фейи Вирироссиядин турнирда вахт амаз кьве сеферда гъалибвал къазанмишай, виниз тир устадвал къалурай чи ватанэгьли, къизилдин медалриз хьиз, спортдин мастервилин тIварцIизни лайихлу хьана. Арсенахъ панкратиондайни хъсан нетижаяр ава. Ам Россиядин кIвенкIвечивал патал акъажунрин гъалибчи я. Ада «Old school fighters» клубда тренер Артур Мегьамедован гъилик вичин устадвал хкажзава.
Рагнеда Рамалданова
