Халидин жуьрейрин майваяр кIва­­тIу­най Дагъустан Россиядин кIвен­кIве­чий­рин сиягьда гьатнава: алай йисуз  республикада 172 агъзур тонн­дилай гзаф бегьер вахчунва. РД-дин хуьруьн майишатдин ва недай суьрсетдин министерстводи хабар гузвайвал, Россельхозбанкди уьлкведин мулкунал 2026-йисан халийрин сезондин сифтегьан нетижаяр кьунва: Астрахандихъ, Волгограддихъ, Оренбургдин­ об­ластдихъ ва Краснодардин крайдихъ галаз сад хьиз  Да­гъустан Республикани къарпузар, халияр ва буранар гьасилзавай  асул регионрин жергеда гьатнава.

Виликамаз авунвай гьисаб­ралди, уьлкведа халийрин жуьрейрин майвайрин бегьер алатай йисан дережада амукьда – 1,6-1,7 миллион тонндилай тIимил жедач. Ида уьлкведин къенепатан игьтияжар тамамрзава. 

Уьлкведин мулкунал салан майва­яр алай йисуз 92 агъзур гектардин майданра гьасилзава. СКФО-дал умуми кьадардин 15,3 процент гьалтзава. Дагъустанди и нетижадик кьилин пай кутазва: чи республикада къенин­ йикъалди 172 агъзур тонндин бегьер кIватIнава. И жигьетдай пешекарри гъвечIи майишатри къугъвазвай роль къейдзава: салан майваяр гьасилзавай майданрин пудакай тахминан кьве пай  агьалийрин кьилдин майишатрал (ЛПХ) гьалтзава, са пай – лежбервилинни фермервилин майишатрал (КФХ).

Чи республикада салан майвайри­ тахминан 8 агъзур гектардин мулкар кьунва. Хуьруьн майишатдин хилен адетар девлетлубур тир  Дагъустан патал им гъвечIи агробизнес вилик тухунин важиб­лу хел я, къейдзава министерстводи. 

Чи  мухбир