Дяведин махсус серенжем давам жезва. Да­гъустандин рухвайри, уьлкведин Президент­ Владимир Путина лагьайвал, женгера ви­кIегь­вилелди иштиракзава. Залан хирер хьайи­бур, къуллугъ авунин икьрардин вахт акьалтIнавайбур хквезва. Абур ислягь уьмуьр­дик кухтун патал уьлкведа ва респуб­ликада «Ватан хуьзвайбур» фонд, кадрийрин «Россияда – кIвалах» центр ва «Кадрияр» милли проект ава. И проектдин сергьятра аваз, СВО-дин ветеранриз цIийи ва алава пеше къачудай мумкинвални гузва.

Региондин зегьметдин ва яшайишдин рекьяй вилик финин министрдин везифаяр вахтуналди тамамарзавай Мегьамедзагьид Кихасурова лагьайвал, республикадин 47 муниципалитетдин­ агьалийриз яшайишдин рекьяй къуллугъдай центрайри СВО-дин ветеранриз кIвалахдай чкаяр теклифзава. Абур армиядай тамамвилелди хквезвай аскеррин ва офицеррин яшайиш къайдадик кутунин карда куьмек гунал машгъул жеда.

Ихьтин фикирдал Россиядин армияда вичин пак везифаяр тамамарна хтанвай аскеррин патай арзаяр гзаф хьуни гъана. Мисал яз, жуьрэтлувилин орден авай Азамат Мамаев Украинадин фашистрихъ галаз женг чIугваз гуьгьуьллувилелди фена. Залан хер хьуникди ам кIвализ ахъай хъувуна. Чкадал чарасуз месэла туькIуьр тийидайла, ада, министрдин патав фена,  вичиз набутвал, протез гунин карда куьмек тIалабна.

М. Кихасуров Азаматаз къуллугъзавай по­лик­линикадин кьилин духтурдихъ галаз рахана ва и йикъара месэла гьялда.

Гьа са вахтунда Азамат Мамаева вичиз армиядай ахъай хъийизвай аскеррихъ галаз кIва­лахиз, абуруз яшайишдин месэлаяр гьялунин карда куьмек гуз кIанзавайдакайни лагьана. ГьикI лагьайтIа, армиядай кIвализ хтай аскерар бязи четинвилера гьатзава.

*  *  *

И йикъара РФ-дин Президентдин Админист­рациядин, СКФО-да Президентдин­ векилдин аппаратдин ва «Ватан хуьзвайбур» госфондунин векилар Дагъустандин­ жемиятдин «Память гор» тешкилатдин кIва­лахдихъ галаз таниш хьана.

РФ-дин Президентдин Управленидин рефе­рент­ Владислав Бочков ва СКФО-да Президентдин­ векилдин заместитель Владимир Надыкто тешки­лат­­дин коллективдихъ, СВО-да телеф хьайи ас­керрин дидейрихъ, хендедайрихъ галаз гуьруьшмиш­ хьана, абурун дерди-гьалдикай хабарар кьу­на­.

Дяведин махсус серенжемдин иштиракчийриз ва абурун хизанриз яшайишдин рекьяй куьмек гунин, телеф хьайи къагьриманар рикIел хуьнин карда Дагъустанди кIватIнавай тежрибадиз мугьманри еке къимет гана ва ам маса регионрани гегьеншарун лазим тирдакай лагьана.

Жемиятдин «Память гор» тешкилатдин председатель Патимат Пайзулаевади Москвадай атанвай экспертриз республикада­ уьмуьрдиз кечирмишзавай жемиятдин проектрикай, игитар рикIел хуьн патал кьиле тухузвай кьван мярекат­рикай, жегьилар ватанпересвилин руьгьдаллаз тербияламишуниз гузвай кьетIен фикирдикай малуматар гана.

Владислав Бочкова дагъустанвийри кьил кутунвай крарин виниз тир дережа къейд авуна. «Са рахунни алач, куь тежриба чна Россиядин маса регионризни теклифда», – лагьана ада.

Абад  Азадов