Гатфарин бул марфар себеб яз, алай йисуз Бабаюрт, Хасавюрт, Тарумовский ва Къизляр районрин майи­шат­ра лап хъсандаказ векь акьалтнава. Къенин юкъуз республикада 494,6 агъзур тонндилай виниз векъи алафар гьазурнава.

Кьилди къачуртIа, РД-дин хуьруьн майишатдин ва недай суьрсетдин министерстводи хабар гузвайвал, респуб­ликадин майишатри 486,3 агъзур тонн векь, (асул пай тешкилзава), 8,3 агъзур тонн сенаж ва 4,4 агъзур тонн силос (миже квай алафар) гьазурнава.

Лагьана кIанда хьи, малдарвилин хел дурумлудаказ ерилу алафралди таъминарун вич галачиз я нехирдин кьадар гзафариз, я кIвалин гьайванрин бегьерлувал хкажиз тежедай бине я. Кардин гъавурда аваз, республикадин чуьллерани никIера векь ягъунин ва алафар гьазурунин кIвалахар давам жезва.

РикIел хкин, алатай кьуьд акъудун патал республикадин лежберри, планда къалурнавай кьадардилайни алудна, 1,616 миллион тонн векъи ва миже квай алафар гьазурнай.  

Жасмина Саидова