РД-дин Гьукуматдин Председатель Мегьамед Рамазанова и йикъара РФ-дин эцигунрин ва ЖКХ-дин министр Ирек Файзуллинахъ галаз гуьруьш кьиле тухвана. Идакай «Лезги газетдиз»­ Дагъус­тандин  Гьукуматдин пресс-къуллугъди хабар гана.

Гуьруьшдал веревирд авур кьилин месэла алай йисан гатфарихъ къвайи къати марфарин нетижада зиянар хьайи дагъустанвийриз гузвай куьмекдихъ, хасаратвилер хьанвай дараматар цIийикIа туькIуьр хъувунихъ ва республика зулунни хъуьтIуьн муддатдиз гьазур хьунихъ галаз алакъалу тир.

«КIвалах давам жезва. Гьар са хизандив вахтунда куьмек агакьун ва агьалияр адетдин къулайвилер авай яшайишдив эгечI хъувун лап важиблу я. Чи вилик Россиядин Президент Владимир Путина гьа ихьтин везифаяр  эцигнава ва абур кьилиз акъудун чи эвелимжи буржи я…», – лагьана Гьукуматдин Председателди.

Ирек Файзуллина къейд авурвал, алай йисан 9 вацран нетижайрал асаслу яз, Дагъус­танда яшайишдин кIва­лерин 1,3 млн квадратдин метр ишлемишиз вахканва. Министрдин фикирдалди, мулкар вилик тухун тек са цIийи кIвалер эцигунал сергьятламиш жезвач. Ин­санриз яшайишда герек къвезвай вири къулайвилер тешкилун важиблу я. Идахъ галаз алакъалу яз, гуьруьшдал М. Рамаза­новани И. Файзуллина «Яшайиш патал къурулушар» проект кьилиз акъудуниз талукь месэлаярни веревирдна.

Чи  мухбир