Докъузпара районда 16-мартдиз альпинизмдай Россиядин чемпионат га­тIуннава, ам вацран эхирдалди давам жеда. Идакай «Лезги газетдиз» муниципалитетдин администрациядин пресс-къуллугъди хабар гана.

Къейд ийин хьи, чемпионатдин асул мярекатар Къурушрин хуьре, Ярудагъдин мулкара кьиле физва. Кьуд лагьай сеферда тешкилзавай и акъажунра цIи Россиядин 14 региондай 18 командади иштиракзава. Абурун арада Москва, Севас­тополь шегьерар, Воронеждин, Москвадин, Пензадин, Рос­товдин ва маса облас­тар, Ставрополдин, Красноярскдин краяр­, Дагъус­тан, Башкортостан, Татарстан ва маса регионар ава.

Чемпионат ачухуниз талукьарнавай мярекатда Докъузпара райондин кьил Мегьамед Шамилова, РД-дин спортдин ва физический культурадин министерстводин управленидин начальник Марат Ибрагьимова, альпинизмдин федерациядин вице-президент Александр Пятницина, альпинизмдин федерациядин председатель Петр Леонова ва масабуру иштиракна. М.Шамилова райондиз атанвай мугьманрин тIварцIихъ хуш келимаяр лагьана, альпинизмдай кьиле физвай чемпионат республикадин спортдин уьмуьрда лишанлу вакъиа тирди къейдна, иштиракчийрихъ агалкьунар хьун алхишна.

Мярекатдал рахай Александр Пятницина альпинизмдай тешкилнавай чемпионат хаталу акъажунар тирди ва иштиракчийри датIана хатасузвал хуьниз фикир гана кIанзавайди рикIел хкана. «Квелай вуч алакьзаватIа, — къалура, анжах хатасузвал рикIелай алудмир», — лагьана ада.

Чи  мухбир