Чаз чизвайвал, «Лезги газетдин» чинра Шариатдин текстер, диндиз талукь макъалаяр, Къуръандин аятрин манайрин таржумаяр, Аллагьдин ТIварар… чапзава. И кардихъ галаз алакъалу яз, кIелзавайбурувай чна газет чиркин чкайриз гадар тавун, анра ишлемиш тавун тIалабзава.
Кьилди къачуртIа, газетдин гьар са нумрада, 15-чина, диндиз талукь рубрикадик кваз материалар чапзава. Чна газет кIелзавайбуруз иллаки и чинив гьуьрметдивди эгечIуниз эвер гузва.
Суал арадал атун мумкин я: бес кIелайдалай кьулухъ газетдин Шариатдин текстер авай чинриз вуч ийида? Ихьтин дуьшуьшра диндин материалар авай газетар ва я тахьайтIа кьилди чинар са михьи чкадал цIай яна, руьхъ жедалди куг, руьхъ лагьайтIа, накьвадик кутур. Гаф кватай чкадал къейд ийин хьи, Шариатдин текстер авай маса такьатривни ихьтин дуьшуьшра гьа и къайдада эгечIна кIанда. Ахьтин чарар, газетар, журналар, ктабар… (эгер абур хуьдай ва я маса касдив вахкудай фикир авачтIа) акатайвал чиркин чкайриз гадарун ва я ахьтин чкайра ишлемишун, абурув гьуьрметсуздаказ эгечIун къадагъа я. Къейд ийин хьи, Шариатдин текстерив гьуьрметдивди, къайгъударвилелди эгечIай касдиз суваб жезва.
Чна газет кIелзавайбурувай и малуматдив рикIивай эгечIун тIалабзава. Чун вири Аллагьдихъ муьгьтеж лукIар тирди садрани рикIелай алудна кIандач!
«Лезги газет»
